Qazaqstandyqtar áleýmettik jelilerde polısıa qyzmetkerleriniń eki kámeletke tolmaǵandy ustaǵan vıdeosyn belsendi túrde talqylap jatyr. Jarıalanym avtorynyń aıtýynsha, oqıǵa Astanada bolǵan, dep habarlaıdy infohub.kz saıty.
dosansan degen atpen belgili qoldanýshy Threads áleýmettik jelisinde polıseılerdiń balalarǵa kúsh qoldanǵanyn kórsetetin kadrlardy jarıalady. «Meniń túsinýimshe, polısıa qyzmetkerleri balalardy túngi 11-den keıin ustaǵan. Balalarǵa 23:00-den keıin shyǵýǵa bolmaıdy. Biraq bul qyzmetkerlerdiń áreketi durys pa? Balaǵa adamgershilikpen túsindirip, ata-anasyna qońyraý shalýǵa múmkindik berýge bolmaı ma?» — dep jazdy avtor.
Astana qalalyq polısıa departamenti NUR.KZ tilshisine 17 tamyzda tún ortasy shamasynda elordanyń Saryarqa aýdanynda eresekterdiń ertip júrýinsiz 10 jáne 12 jastaǵy eki kámeletke tolmaǵan anyqtalǵanyn túsindirdi. «Balalardyń qaýipsizdigin qamtamasyz etý maqsatynda polıseıler zańda kózdelgen sharalardy qoldandy: kámeletke tolmaǵandardyń jeke basyn anyqtaý, olardy polısıa bólimshesine jetkizý jáne zańdy ókilderine tapsyrý qajet boldy. Jetkizý kezinde 12 jastaǵy qyz polısıa qyzmetkerleriniń talaptaryna qarsylyq kórsetip, jerge jatyp, jylaı bastady. Dál osy sátti janynan ótip bara jatqan áıel vıdeoǵa túsirip alǵan. Biraq jarıalanǵan úzindi aldyńǵy jaǵdaılardy jáne polısıa qyzmetkerleriniń áreketteriniń sebepterin kórsetpeıdi. Oqıǵa ornyna qyzdyń anasy shaqyrtyldy», — delingen polısıa jaýabynda.
Eki balanyń da ata-anasy kámeletke tolmaǵandardyń túngi ýaqytta zańdy ókilderiniń ertip júrýinsiz turǵyn úıden tys jerde bolýyna baılanysty ákimshilik jaýapkershilikke tartylǵany habarlandy. «Kámeletke tolmaǵandardyń ata-analary tarapynan polısıa qyzmetkerleriniń áreketterine qatysty eshqandaı ótinish nemese shaǵym túsken joq. Azamattardy oqıǵanyń barlyq mán-jaıyn eskermeı, beınejazbanyń jekelegen úzindisi boıynsha qorytyndy jasamaýǵa shaqyramyz. Sondaı-aq ishki ister organdary qyzmetkerleriniń zańdy qyzmetine aralasýǵa jol berilmeıtinin eske salamyz. Mundaı talaptar eń aldymen balalardyń ózin qorǵaý úshin qoıylǵan», — dep qosty polısıa.
Quqyq qorǵaý organdary bıylǵy jyldyń basynan beri 200-den astam kámeletke tolmaǵan qylmystyń qurbany bolǵanyn, 400-den astamy jol-kólik oqıǵalarynda zardap shekkenin de habarlady. «Bul sandar balalardy, ásirese túngi ýaqytta, qaraýsyz qaldyrmaýdyń qanshalyqty mańyzdy ekenin taǵy bir ret kórsetedi. Osy kezeńde polısıa kámeletke tolmaǵandardyń zańdy ókilderiniń ertip júrýinsiz túngi ýaqytta bolýynyń 7 myńnan astam faktisin anyqtady. Sondyqtan túnde balany eresektersiz anyqtaǵan kezde polısıa zańda kózdelgen sharalardy qoldanýǵa, onyń jeke basyn anyqtaýǵa, ata-anasymen baılanysýǵa jáne onyń qaýipsizdigin qamtamasyz etýge mindetti», — dedi DP-da.