Qyrkúıek aıynda Astanada áıgili fransýz klýby «Parı Sen-Jermenniń» (PSG) resmı balalar akademıasy jumysyn bastaıdy. Qazaqstan PSG Academy halyqaralyq jelisine qosylǵan 24-shi el boldy, dep habarlaıdy infohub.kz saıty.
Akademıanyń alǵashqy oqý-jattyǵý ortalyǵy elordadaǵy Air Arena sport kesheninde ornalasady. FIFA standartyna saı tolyq ólshemdi alańy bar jabyq keshen jas sportshylarǵa aýa raıyna qaramastan jyl boıy jattyǵýǵa múmkindik beredi.
Alǵashqy maýsymda akademıa 6 ben 14 jas aralyǵyndaǵy 300-ge jýyq balany qabyldaýdy josparlap otyr. Balalar jasy men daıyndyq deńgeıine qaraı toptarǵa bólinedi, al oqý prosesi parıjdik klýbtyń resmı ádistemesi boıynsha júrgiziledi.
PSG Academy Kazakhstan jobasynyń negizin qalaýshy — kásipker Almaz Alsenov. Onyń aıtýynsha, akademıanyń basty maqsaty — álemdik deńgeıdegi daıyndyq júıesin qoljetimdi etý jáne balalardyń sporttyq ári tulǵalyq ósýine jaǵdaı jasaý.
Joba sondaı-aq balalar fýtbolyn damytýǵa jáne qazaqstandyq mamandardyń biliktiligin arttyrýǵa kúshti serpin beredi. Akademıanyń barlyq jattyqtyrýshylary PSG Academy baǵdarlamasy boıynsha arnaıy oqýdan ótip, Parıjdegi «PSJ» tehnıkalyq mamandarynan turaqty ádistemelik qoldaý alady.
«Akademıanyń basty maqsaty — balalarǵa álemdik deńgeıdegi daıyndyq júıesin qoljetimdi etý jáne olardyń sporttyq ári tulǵalyq ósýine jaǵdaı jasaý», — dep atap ótti PSG Academy Kazakhstan negizin qalaýshy Almaz Alsenov.
Astana tek bastapqy núkte bolady: bolashaqta franshızany Qazaqstannyń basqa óńirlerine de keńeıtý josparlanýda.
2005 jyly qurylǵan PSG Academy búginde álemdegi eń iri fýtbol jelileriniń biri bolyp tabylady. 24 elde 200-den astam jattyǵý ortalyǵy jumys isteıdi, onda jyl saıyn 50 myńnan astam jas fýtbolshy oqıdy.