Qazaqstan astanasynda azyq-túlikti robot-kýrerler arqyly tegin jetkizý boıynsha pılottyq joba bastaldy. Ázirge qyzmet tek Esil jáne Nura aýdandarynyń turǵyndaryna qoljetimdi, dep habarlaıdy infohub.kz saıty.
Jobany Astana ákimdigi polısıa departamentimen, «Astana Innovations» AQ jáne Yandex Qazaqstan kompanıasymen birlesip, Sıfrlyq damý, ınovasıalar jáne aeroǵarysh ónerkásibi mınıstrliginiń qoldaýymen júzege asyrýda.
Qyzmetti paıdalaný úshin Yandex Go qosymshasyn ashyp, «Lavka» bólimine ótip, tapsyrys berý kerek. Eger jetkizý mekenjaıy pılottyq joba aımaǵyna kirse, paıdalanýshy kádimgi kýrerdi nemese robot-jetkizýshini tańdaı alady. Robotpen jetkizý úshin qosymsha aqy alynbaıdy.
«Robot úıge jaıaý júrginshiler jolymen barady jáne kireberis tusyndaǵy trotýarda nemese jaqyn jerdegi qoljetimdi núktede toqtaıdy. Paıdalanýshy onyń qozǵalysyn qosymshadan baqylaı alady, al kelgennen keıin smartfon arqyly júk salǵyshyn ashyp, tapsyrysyn alady», — dep túsindirdi ákimdikte.
Robottar marshrýtty óz betinshe salady jáne navıgasıa júıeleri, kompúterlik kórý jáne zattardy taný kómegimen aınaladaǵy jaǵdaıdy taldaıdy. Olar kedergilerdi aınalyp ótedi, jaıaý júrginshilerdi ótkizedi, jyldamdyqty báseńdetedi jáne qajet bolǵanda toqtaıdy. Ortasha jyldamdyǵy saǵatyna shamamen 6 km, al konstrýksıasy ártúrli aýa raıy jaǵdaıynda jumys isteýge múmkindik beredi.
Buǵan deıin «Kýrsıv» Astanada alǵashqy aerotaksıdiń demonstrasıalyq ushýy ótkenin habarlaǵan bolatyn.