Almatyda ýnıversıtetter arasyndaǵy shahmattan álem chempıonatynyń pleı-off kezeńi bastaldy. Shırek fınaldyń birinshi raýndynda Qazaq ulttyq sport ýnıversıtetiniń (QUSÝ) komandasy Afına Ulttyq tehnıkalyq ýnıversıtetiniń quramasymen esep teń aıaqtady (2:2), dep habarlaıdy infohub.kz saıty.
Qazaqstandyq komanda sapynda grosmeıster Qazybek Nógerbek pen halyqaralyq sheber Merýert Qamalıdenova jeńiske jetti. Qazybek aq túspen grosmeıster Dımıtrıs Aleksakısti, al Merýert qara túspen FIDE áıelder sheberi Panagıota Kıýsıdi utty.
Halyqaralyq sheberler Sátbek Ahmedınov (qara túspen) jáne Arystan Isanjýlov (aq túspen) tıisinshe FIDE sheberleri Nıkolaos Kýtlas pen Vasılıos Kasıýmıske ese jiberdi.
Búgin keshke ekinshi týr ótedi, onda qarsylastar fıgýralardyń túsin aýystyrady. Elordalyq komanda grekterdi jeńse, jartylaı fınalda, eń aldymen, favorıtterdiń biri – Ekaterınbýrgtegi Oral taý-ken ýnıversıtetiniń quramasymen kezdesedi. Reseılik shahmatshylar shırek fınaldyń birinshi týrynda chılılikterdi 4:0 esebimen tas-talqan etti.
Ýnıversıtetter arasyndaǵy shahmattan 2026 jylǵy komandalyq álem chempıonaty Almatyda ótip jatyr. Shırek fınalda taǵy kezdesedi: ÝTKÝ (Reseı) – Chılı ýnıversıteti (4:0), Tehas ýnıversıteti (AQSh) – Gýnadarma ýnıversıteti (Indonezıa) (3:1), Sent-Lýıs ýnıversıteti (AQSh) – Garvard ýnıversıteti (AQSh) (4:0).
Shırek fınaldar, jartylaı fınaldar, úshinshi oryn úshin mach jáne fınal, toptyq kezeń machtary sıaqty, eki raýndta ótedi. Teń bolǵan jaǵdaıda jeńimpazdardy taı-breık anyqtaıdy.
Machtar tórt taqtada ótedi. Ár komanda quramynda keminde bir er jáne keminde bir áıel bolýy kerek. Ýaqyt baqylaýy – 45 mınýt plús ár júriske 30 sekýnd, birinshi júristen bastap.
Týrnırdi FIDE QR Týrızm jáne sport mınıstrligimen, QR Ǵylym jáne joǵary bilim mınıstrligimen, Qazaqstan shahmat federasıasymen jáne Almaty qalasynyń ákimdigimen birlesip uıymdastyrdy. Bas seriktester – Freedom kompanıalar toby jáne «Shapaǵat» korporatıvtik qory.
Jalpy júlde qory 50 myń eýrony quraıdy. Chempıondar 25 myń eýro, vıse-chempıondar 15 myń eýro, al úshinshi oryn alǵan komanda 10 myń eýro bólisedi.