Qazaqstan astanasynda eki er adam turǵyn úı kesheniniń aýlasyndaǵy shalshyqta buzaqylyq jasaǵany úshin jaýapkershilikke tartyldy. Oqıǵa qatty jańbyrdan keıin, qala kósheleri men aýlalar sýǵa tolǵan kezde bolǵan. Quqyq qorǵaý organdary buzaqylardyń jeke basyn áleýmettik jelilerde taraǵan vıdeo arqyly anyqtady, dep habarlaıdy infohub.kz saıty.
Qaznette jarıalanǵan kadrlarda eki er adamnyń jańbyr sýynyń shalshyǵynda otyryp, аlkogól iship, balalarǵa sý shashyp jatqany kórinedi. Polısıa tekserý júrgizip, buzaqylardy ustady. Olar 37 jastaǵy Alekseı Svırıdov pen 35 jastaǵy Vladımır Logvın bolyp shyqty. Ekeýi de usaq buzaqylyq úshin jaýapkershilikke tartyldy.
Sot sheshimimen Alekseı Svırıdov 25 táýlikke, al Vladımır Logvın 7 táýlikke qamaýǵa alyndy. Astana polısıa departamenti qoǵamdyq oryndarda mundaı minez-qulyqqa jol berilmeıtinin jáne azamattardyń tynyshtyǵy men qaýipsizdigin buzatyn kez kelgen áreket qatań túrde toqtatylatynyn eskertti.
Eske salaıyq, bir kún buryn astanaǵa qatty jańbyr jaýyp, kóshelerdi birneshe mınýt ishinde aǵysty ózenderge aınaldyrǵan edi. Nóser kárizi sý kólemine tótep bere almaı, eń qıyn jaǵdaı Momyshuly men Táýelsizdik dańǵyldarynda qalyptasty. Qala turǵyndary sý basqan joldar men isten shyqqan kólikterdiń kadrlaryn jappaı bólisti. Buǵan deıin qutqarýshylar sý astynda qalǵan kólik ıelerine kómekteskeni habarlanǵan.