Búgin tańerteń Astana – Shýchınsk tas jolynda Toyota Land Cruiser Prado kóliginiń qatysýymen jol-kólik oqıǵasy boldy. Avtokólik aqy tóleý pýnktiniń dál qasynda aýdarylyp qaldy, dep habarlaıdy infohub.kz saıty.
«KazAvtoJol» ulttyq kompanıasynyń baspasóz qyzmetiniń málimetinshe, oqıǵa 15 tamyzda saǵat 08:43-te «Astana» tólem pýnktine jaqyndaǵan kezde bolǵan. Aldyn ala anyqtalǵandaı, júrgizýshi rúlde uıyqtap ketken, saldarynan kólik basqarýdan shyǵyp, qozǵalystyń úshinshi jáne tórtinshi jolaqtary arasyndaǵy jol ınfraqurylymynyń elementterine soǵylǵan.
Baqytymyzǵa oraı, apat saldarynan eshkim zardap shekken joq. Júrgizýshi kólikte jalǵyz bolǵan jáne medısınalyq kómekten bas tartqan. JKO saldarynan úshinshi jáne tórtinshi jolaqtar boıynsha qozǵalys ýaqytsha shektelgen. Oqıǵanyń saldary joıylǵannan keıin saǵat 11:34-te qozǵalys tolyq qalpyna keltirildi.
Kompanıada soqqy saldarynan jol belgisi, bólý býferi jáne beton blok zaqymdanǵanyn naqtylady. Júrgizýshilerge sharshaǵandyq zeıin men reaksıa jyldamdyǵyn basqa qaýipti faktorlardan kem túsirmeıtinin eske saldy. «Jolda uıqyshyldyq sezseńiz, kózińizdiń aýyrlyǵyn baıqasańyz nemese zeıinińizdiń tómendep bara jatqanyn ańǵarsańyz, mejeli jerge "jetemin" dep áreket jasamańyz. Qaýipsiz jerge toqtap, demalyńyz. Búgin bári zaqymdalǵan kólik pen jol ınfraqurylymymen aıaqtaldy. Basqa jaǵdaıda birneshe sekýndtyq uıqynyń baǵasy áldeqaıda joǵary bolýy múmkin», — delingen habarlamada.