Qazaqstan astanasynda Uly Otan soǵysynyń ardageri, Astanadaǵy sońǵy maıdandas sanalǵan Rzaǵul Baıkeshevpen qoshtasý rásimi ótti. Ardager 103 jasynda dúnıeden ozdy, dep habarlaıdy infohub.kz.
Ardagerdiń esimine qurmet kórsetýge Qorǵanys mınıstrliginiń ókilderi, Astana qalasy maslıhatynyń hatshysy Zeınýlkabden Tabıǵat, Astana qalasy Almaty aýdanynyń ákimi Rústembek Táýekelov, Aqmola garnızony áskerı bólimderiniń komandırleri, ardagerler uıymdarynyń ókilderi, sondaı-aq marqumnyń týǵan-týystary men jaqyndary keldi.
Qorǵanys mınıstriniń atynan ardagerdiń otbasyna tereń kóńil aıtýdy Astana qalasy Almaty aýdany boıynsha qorǵanys isteri basqarmasynyń bastyǵy, podpolkovnık Serik Qasenov jetkizdi.
Aza tutý sharasy Qurmetti qaraýyl men áskerı orkestrdiń qatysýymen ótti. Ardagerdi eske alý úshin janaza namazy oqyldy.
Rzaǵul Baıkeshev 1923 jyly 18 qazanda Aqtóbe oblysynyń Muǵaljar aýdanynda dúnıege kelgen. Ol Keńes áskeri quramynda Rjev túbindegi shaıqastarǵa, Velıkıe Lýkı shabýyl operasıasyna qatysyp, Polsha, Vengrıa arqyly maıdan joldaryn júrip ótip, Berlınde Jeńisti qarsy aldy.
Rzaǵul Baıkeshevtiń erligi men batyldyǵy İ jáne İİ dárejeli Otan soǵysy ordenderimen jáne basqa da memlekettik nagradalarmen atap ótildi.
Ardager Aqmola oblysyndaǵy Qabanbaı batyr aýylynda (burynǵy Rojdestvenka) sońǵy mekenin tapty, onda ol uzaq jyldar boıy keńsharda ekspedıtor bolyp jumys istedi. Jeńis sarbazynyń qurmetine salút komandasy úsh ret oq atyldy.
Onyń erligi men laıyqty ómir joly týraly jarqyn estelik tarıhta jáne urpaqtar júreginde máńgi saqtalady.