Astanada qarjy pıramıdasy qurylymdyq bólimshesiniń basshysyna qatysty aıyptaý úkimi oqyldy. Onyń áreketinen eki salymshy shamamen 23 mln teńgeden aıyryldy, dep habarlaıdy infohub.kz saıty.
NUR.KZ-tiń Astana sottaryna silteme jasap habarlaýynsha, 2026 jylǵy 17 qyrkúıekte Astananyń aýdanaralyq qylmystyq ister jónindegi soty Qylmystyq kodekstiń 217-baby 3-bóliginiń 2-tarmaǵy boıynsha qarjy pıramıdasyn quryp, oǵan basshylyq etti dep aıyptalǵan M. azamatshasyn kináli dep tanydy.
«Qylmystyq tergeý organy M.-ny World Business Consulting qarjy pıramıdasynyń qurylymdyq bólimshesine basshylyq etti dep aıyptady. Altynshy deńgeıdegi dırektor bola tura, ol jábirlenýshilerge jalpy somasy shamamen 23 mln teńge materıaldyq zalal keltirdi», — delingen sot habarlamasynda.
Sot 2020 jyldyń tamyz–qyrkúıek aılarynda M. qarjy pıramıdasyna basshylyq ete júrip, erekshe iri mólsherde aqsha qarajatyn tartqanyn anyqtady. Onyń áreketinen eki jábirlenýshige materıaldyq zalal keltirildi: B. — shamamen 8 mln teńge, R. — shamamen 15 mln teńge.
«Sottalýshynyń kinási jábirlenýshiler men kýágerlerdiń aıǵaqtarymen, zattaı dáleldemelermen jáne qylmystyq istiń basqa da materıaldarymen dáleldendi. Prokýror M.-ǵa 6 jylǵa bas bostandyǵynan aıyrý jazasyn, sondaı-aq azamattardyń aqsha qarajaty men ınvestısıalaryn tartýǵa baılanysty qyzmetpen aınalysý quqyǵynan 5 jylǵa aıyrýdy surady. Sottalýshy kinásin ishinara moıyndady. Qorǵaýshy tarap onyń áreketinde qylmystyq quqyq buzýshylyq quramy joq dep aqtaýdy surady», — delingen sot habarlamasynda.
Aıta keteıik, Qylmystyq kodekstiń 217-baby 3-bóliginiń sanksıasy múlki tárkilenip, 5 jyldan 12 jylǵa deıin bas bostandyǵynan aıyrýdy, sondaı-aq 7 jylǵa deıin belgili bir laýazymdardy atqarý nemese belgili bir qyzmetpen aınalysý quqyǵynan aıyrýdy kózdeıdi.
Jaza taǵaıyndaý kezinde sot zalaldy ishinara óz erkimen óteýdi jeńildetetin mán-jaı retinde eskerdi. Aýyrlatatyn mán-jaılardy sot anyqtaǵan joq.
«Jasalǵan qylmystyq quqyq buzýshylyqtyń mán-jaıy men aýyrlyq dárejesin, jeńildetetin mán-jaıdyń bar ekenin jáne aýyrlatatyn mán-jaılardyń joqtyǵyn (buryn sotty bolmaǵan) eskere otyryp, sot M.-ny QK 217-baby 3-bóliginiń 2-tarmaǵy boıynsha kináli dep tanyp, jazasyn qylmystyq-atqarý júıesiniń eń tómengi qaýipsizdik mekemesinde óteýmen 5 jylǵa bas bostandyǵynan aıyrýǵa, sondaı-aq azamattardyń aqsha qarajaty men ınvestısıalaryn tartýǵa baılanysty qyzmetpen aınalysý quqyǵynan 5 jylǵa aıyrýǵa taǵaıyndady», — dedi sotta.
Jábirlenýshi B.-nyń azamattyq talap-aryzy qanaǵattandyryldy. Úkim zańdy kúshine engen joq.