Qazaqstan astanasynda el tarıhynda tuńǵysh ret EH216-S ushqyshsyz áýe kemesi jolaýshymen ushý jasady, dep habarlaıdy infohub.kz saıty.
Azamattyq avıasıa komıtetiniń málimetinshe, tik ushý men qonýǵa qabiletti serıalyq elektrlik áýe apparaty (eVTOL) «Bolashaq oıyndary 2026» halyqaralyq týrnıri aıasynda Astananyń arnaıy ruqsat etilgen aýmaǵynda jolaýshymen demonstrasıalyq ushý jasady.
Bort eki jolaýshyǵa arnalǵan, saǵatyna 130 km-ge deıin jyldamdyqqa jete alady jáne 35 km-ge deıingi qashyqtyqqa ushýǵa qabiletti. «Birinshi kezeńde Qazaqstannyń tabıǵı, mádenı jáne tarıhı kórikti jerleriniń ústinen 5-ten 30 mınýtqa deıingi demonstrasıalyq jáne týrısik baǵyttardy uıymdastyrý qarastyrylýda. Bolashaqta ushqyshsyz jolaýshylar áýe júıeleri eldiń zamanaýı kólik ınfraqurylymynyń bóligine aınalyp, qoldanystaǵy mobıldilik túrlerin tolyqtyra alady», — dedi komıtette.
Komıtettiń dereginshe, ushqyshsyz áýe júıeleri shuǵyl medısınalyq kómek kórsetý, dári-dármek jetkizý, órt sóndirý, logıstıka jáne jyldamdyq pen jedeldik mańyzdy basqa da baǵyttarda qoldanylýy múmkin.
«Jeke baǵyt — otandyq óndiristi damytý. Halyqaralyq áriptestik aıasynda Qazaqstanda jolaýshylarǵa arnalǵan ushqyshsyz áýe júıeleriniń óndirisin lokalızasıalaý josparlanýda. Bul joǵary tehnologıalyq mashına jasaýda jańa quzyretterdi qalyptastyrýǵa, qosymsha jumys oryndaryn ashýǵa jáne ónerkásiptik kooperasıany keńeıtýge múmkindik beredi», — dep qosty komıtette.
Habarlamada sondaı-aq Qazaqstanda eVTOL áýe kemelerin paıdalanýdy, vertıporttardyń qyzmetin jáne ushqyshsyz áýe qozǵalysyn basqarý júıelerin retteıtin zańnamalyq ózgerister qabyldanǵany aıtylǵan. Buǵan deıin premer-mınıstrdiń orynbasary Qanat Bozymbaev úkimettegi baspasóz máslıhatynda aerotaksımen júrý qansha turatynyn aıtqan edi. Onyń aıtýynsha, drondardaǵy ushýlar ýaqyt óte qoljetimdi bolady.
Buǵan deıin AutoFlight Prosperity tik ushý men qonýǵa qabiletti elektrlik áýe kemesi (eVTOL) saǵatyna 200 km-ge deıin jyldamdyqqa jete alatyny jáne 200 km-ge deıingi qashyqtyqty eńsere alatyny habarlanǵan.