Atyraý oblysynyń úsh turǵynyna polısıa qyzmetkerlerine shabýyl jasaǵany úshin jaza qatańdatyldy. Bul týraly is kasasıalyq satyda qaralǵannan keıin belgili boldy, dep habarlaıdy infohub.kz.
Bas prokýratýranyń resmı Telegram-arnasynda habarlaýynsha, buǵan deıin Qyzylqoǵa aýdandyq soty polısıa qyzmetkerlerine shabýyl jasaǵany úshin aımaqtyń eki turǵynyn 4 jyl bas bostandyǵyn shekteýge, taǵy bireýin 3 jyl 6 aıǵa bas bostandyǵyn shekteýge sottaǵan.
Tergeý derekteri boıynsha, Maqat aýdanynda er adamdar toby masań kúıde shaqyrtý boıynsha kelgen polısıa qyzmetkerlerine belsendi qarsylyq kórsetken. Oqıǵa barysynda quqyq buzýshylar ókilderge aıaqpen soqqy jasaǵan, sondaı-aq qarý retinde aǵash taıaq pen tasty qoldanǵan. Nátıjesinde polısıa qyzmetkerleriniń biri ortasha aýyrlyqtaǵy dene jaraqatyn alǵan.
Keıin kasasıalyq alqa Bas prokýrordyń orynbasarynyń narazylyǵyn qarap, taǵaıyndalǵan bas bostandyǵyn shekteý jazasy ádiletsiz jáne jasalǵan qylmystyń aýyrlyǵyna sáıkes kelmeıdi degen qorytyndyǵa keldi. Kasasıalyq sot sottalǵandardyń áreketteri qoǵamǵa joǵary qaýip tóndiretinin, óıtkeni olar qoǵamdyq tártipti óreskel buzyp, qyzmettik mindetin atqaryp júrgen polıseıdiń densaýlyǵyna zıan keltirgenin atap ótti.
Osyǵan baılanysty sot aktileri ózgertildi. Eki azamatqa 4 jyldan bas bostandyǵynan aıyrý jazasy taǵaıyndaldy, úshinshisine — 3 jyl 6 aı bas bostandyǵynan aıyrý. Sottalǵandar sot zalynda kúzetke alyndy.