Atyraýda «Astrahan – Mańǵystaý» magıstraldyq sý qubyryn qaıta jańartý kezinde asa iri kólemde alaıaqtyq jasaǵany úshin sot úkim shyǵardy. Bes aıyptalýshy kináli dep tanyldy, dep habarlaıdy infohub.kz.
Atyraý qalasynyń №2 soty anyqtaǵandaı, sqemaǵa «KazTransOıl» kompanıasynyń «Magıstraldyq sý qubyry» enshiles kásipornynyń burynǵy basshysy, onyń orynbasary, merdiger qurylys uıymynyń ókilderi jáne jobalyq fırmanyń quryltaıshysy qatysqan.
Anyqtalǵandaı, aıyptalýshylardyń biri qyzmettik jaǵdaıyn paıdalanyp, merdigerdi is júzinde baqylaı otyryp, basqa qatysýshylarmen birge sý qubyryn qaıta jańartý jobasyn zańsyz túzetken, atap aıtqanda qubyr túrin ózgertken. Bul rette jobalyq-smetalyq qujattamada materıaldardyń quny asyra kórsetilgen, al is júzinde qubyrlar áldeqaıda arzanǵa satyp alynǵan. Osylaısha, ınfraqurylymdyq jobaǵa bólingen qarajat zańsyz shyǵarylǵan.
Sottalýshylar kinásin moıyndamaı, aqtaýdy surady. Alaıda sot olardyń kinásin kýágerlerdiń aıǵaqtarymen, jasyryn tergeý áreketteriniń materıaldarymen, hat-habarlarmen, sondaı-aq mamandar men sarapshylardyń qorytyndylarymen dáleldendi dep sanady.
Sot úkimimen aıyptalýshylar: S. QK 28-baby 3-bóligi, 190-baby 4-bóligi 2-tarmaǵy boıynsha – 6 jyl 8 aıǵa bas bostandyǵynan aıyrýǵa; K. QK 190-baby 4-bóligi 2-tarmaǵy boıynsha – 6 jylǵa bas bostandyǵynan aıyrýǵa; M., I. QK 190-baby 4-bóligi 2-tarmaǵy boıynsha – 6 jylǵa bas bostandyǵynan aıyrýǵa; A. QK 28-baby 5-bóligi, 190-baby 4-bóligi 2-tarmaǵy boıynsha – 5 jylǵa bas bostandyǵynan aıyrýǵa sottaldy. Olarǵa ártúrli merzimge basshylyq laýazymdardy atqarýǵa jáne memlekettik qyzmette jumys isteýge tyıym salyndy. Úkim áli zańdy kúshine engen joq.
Buǵan deıin Bas prokýratýra sý qubyryn qaıta jańartýdyń jalpy quny 17 mlrd teńgeden asqanyn habarlaǵan. Tergeý aıasynda aıyptalýshylardyń múlki tekserildi: shamamen 1,1 mlrd teńgege aktıvter anyqtaldy, onyń bir bóligin sot memleket kirisine tárkiledi. Sot memleketke 6,4 mlrd teńge kólemindegi zalaldy óteý týraly talapty qanaǵattandyrdy. 12 mln teńgege qosymsha talap qanaǵattandyrylmaı qaldy, óıtkeni zalaldyń bul bóligi dáleldenbegen.