Atyraýda áleýmettik jelilerde jol qozǵalysy erejelerin óreskel buzǵan vıdeolardy jarıalaǵan toı kortejiniń qatysýshylary jazaǵa tartyldy, dep habarlaıdy infohub.kz saıty.
İshki ister mınıstrliginiń málimetinshe, polısıa qyzmetkerleri áleýmettik jelilerdi monıtorıńteý kezinde Atyraýdaǵy toı kortejiniń qatysýshylarynyń JQE óreskel buzǵanyn kórsetetin beınematerıaldardy anyqtaǵan. Tekserý barysynda Ábilqaıyr han dańǵylynda Volkswagen Polo jáne Lada Priora avtokólikteriniń júrgizýshileri men jolaýshylary jol qozǵalysy qaýipsizdigine jáne onyń basqa qatysýshylaryna naqty qaýip tóndiretin áreketter jasaǵany anyqtaldy. Tekserý is-sharalarynyń nátıjesinde patrúldik polısıa qyzmetkerleri oqıǵanyń barlyq qatysýshylarynyń jeke basyn anyqtady.
Barlyǵy manevr jasaý erejelerin buzǵany, belgilengen talaptardy buza otyryp kólik quraldaryn basqarǵany jáne paıdalanǵany, qaýipsizdik beldikterin taqpaǵany, sondaı-aq avarıalyq jaǵdaı týǵyzǵany úshin 8 adam jaýapkershilikke tartyldy. Atyraý oblysynyń polısıa departamenti toı kortejderi men basqa da jappaı is-sharalar kezinde jol qozǵalysy erejelerin kez kelgen ádeıi buzý azamattardyń ómiri men densaýlyǵyna qaýip tóndiretinin eske salady. Osyndaı quqyqqa qarsy áreketter úshin kináli tulǵalar Qazaqstan Respýblıkasynyń qoldanystaǵy zańnamasyna sáıkes jaýapkershilikke tartylady.