Atyraý qalalyq ákimdigine qarasty Tomarly aýylynda otbasylyq janjal pyshaqtaýmen aıaqtaldy. 56 jastaǵy er adam ulynyń densaýlyǵyna aýyr zıan keltirdi degen aıyppen sot aldyna keldi, dep habarlaıdy infohub.kz saıty.
İs qujattaryna sáıkes, 11 sáýir kúni keshke áke men bala birge аlkogól iship, keıin olardyń arasynda janjal shyqqan. Tergeý nusqasy boıynsha, uly uıyqtap jatqan ákesine aldymen ózi shabýyl jasap, ony tunshyqtyra bastaǵan. Er adam bosanyp shyǵyp, as úıden pyshaq alyp, ulyna birneshe ret soqqy jasaǵan.
Sot-medısınalyq saraptama jábirlenýshiniń ishine bir, arqasyna bes pyshaq jaraqatyn alǵanyn, baýyr, ishek jáne qabyrǵalary zaqymdanǵanyn anyqtady. Bul jaraqattar densaýlyqqa aýyr zıan retinde baǵalandy.
Sotta aıyptalýshy kinásin tolyq moıyndap, oqıǵadan keıin ulymen tatýlasqanyn aıtyp, ony bas bostandyǵynan aıyrmaýdy surady. Jábirlenýshi janjaldy alǵashqy bolyp bastaǵanyn rastap, ákesine jeńil jaza taǵaıyndaýdy ótindi.
Úkim shyǵarý kezinde sot aıyptalýshynyń ókinýin, taraptardyń tatýlasýyn jáne janjalǵa jábirlenýshiniń zańsyz áreketteri sebep bolǵanyn eskerdi. Aýyrlatatyn mán-jaı retinde аlkogóldik masań kúı tanyldy.
Nátıjesinde er adam úsh jylǵa bas bostandyǵynan aıyrý jazasyna shartty túrde, probasıalyq baqylaýmen sottaldy. Úkim jarıalanǵannan keıin ol sot zalynan bosatyldy.