Atyraý oblysynda 42 jastaǵy áıeldiń ólimine qatysty qylmystyq is tergelýde. Kúdikti — onyń azamattyq kúıeýi. Qaıǵyly oqıǵa qaıtys bolǵan áıeldiń úsh jasar qyzynyń kóz aldynda bolǵan. Keıin qyz bolǵan jaǵdaıdy polısıaǵa aıtyp bergen, dep habarlaıdy infohub.kz.
«Krımınalnyı Kazahstan» Telegram-arnasynyń málimetinshe, áıeldiń denesin úıge qaıtqan 16 jasar qyzy taýyp alǵan. Qaıtys bolǵan áıeldiń qasynda onyń úsh jasar sińlisi bolǵan. Týystarynyń aıtýynsha, qyz polısıa qyzmetkerlerine ákesiniń anasyna pyshaq jaraqatyn salyp, keıin qashyp ketkenin kórgenin aıtqan. Jaqyndarynyń sózinshe, áıeldiń denesinen 28 pyshaq jaraqaty tabylǵan. Sondaı-aq olar qaıtys bolǵan áıeldiń buryn da sojıteldiń agressıvti minez-qulqyna baılanysty polısıaǵa birneshe ret shaǵymdanǵanyn málimdegen.
Atyraý oblysy polısıa departamentinde kúdiktiniń ustalǵanyn rastady. «Turmystyq janjal kezinde áıeldi óltirdi degen kúdikpen 37 jastaǵy er adam ustalyp, ýaqytsha ustaý ızolátoryna qamaldy. Ol qaıtys bolǵan áıelmen azamattyq nekede bolǵan. Osy fakti boıynsha «Adam óltirý» baby boıynsha qylmystyq is qozǵaldy. Qajetti tergeý áreketteriniń kesheni júrgizilýde», — dep habarlady polısıada. Vedomstvo tergeý múddesine baılanysty basqa aqparat jarıa etilmeıtinin qosty.
Buǵan deıin Shyǵys Qazaqstan oblysynda alty balanyń anasy bolǵan burynǵy áıeline qatygezdikpen shabýyl jasady degen kúdikpen 51 jastaǵy er adam ustalǵany habarlanǵan. Polısıa málimetinshe, oqıǵa 25 shildede Samar aýylynda bolǵan. Kúdiktige qatysty qylmystyq is qozǵalyp, ol qamaýǵa alynǵan. Shyǵys Qazaqstan oblysy polısıa departamentinde er adamnyń buryn da jábirlenýshiniń aryzy boıynsha birneshe ret qylmystyq jáne ákimshilik jaýapkershilikke tartylǵanyn jáne ata-ana quqyǵynan aıyrylǵanyn habarlady.