15 tamyzda Qazaqstannyń úsh qalasynda qolaısyz meteorologıalyq jaǵdaılar kútiledi, dep habarlaıdy infohub.kz saıty.
Sınoptıkterdiń málimetinshe, qolaısyz meteojaǵdaılar (QMJ) Almaty men Atyraýda, al túnde Óskemende boljanady.
Mamandardyń túsindirýinshe, qolaısyz meteojaǵdaılar tymyq aýa raıy, álsiz jel, tuman jáne temperatýralyq ınversıanyń tutasýy kezinde paıda bolady. Nátıjesinde lastaýshy zattar atmosferanyń jerge jaqyn qabatynda jınalyp, aýa sapasynyń nasharlaýyna ákelýi múmkin.
Sınoptıkter mundaı kezeńderde densaýlyqqa teris áser etý qaýpi artatynyn, ásirese sozylmaly aýrýlary bar adamdar úshin qaýipti ekenin eskertedi.
Aýanyń lastaný deńgeıine jeldiń jyldamdyǵy, jaýyn-shashyn, ylǵaldylyq jáne aýa temperatýrasy áser etedi.
Turǵyndarǵa kóshede, ásirese avtokólik joldary men basqa da lastaný kózderiniń janynda bolý ýaqytyn qysqartý usynylady. Balalar men júkti áıelderge uzaq serýendeýden bas tartýǵa keńes beriledi.
Tynys alý jáne júrek-qan tamyrlary júıesi aýrýlary bar adamdarǵa, sondaı-aq alergıasy barlarǵa qajetti dári-dármekterdi ózimen birge alyp júrý usynylady. Mamandar ashyq aýadaǵy fızıkalyq belsendilikti shekteýdi jáne múmkindiginshe sabaqtardy jabyq úı-jaılarǵa aýystyrýdy keńes beredi.
Buǵan deıin «Kýrsıv» Qazaqstannyń kóptegen aımaqtarynda 15 tamyzǵa daýyldy eskertý jarıalanǵanyn jazǵan bolatyn. Sınoptıkter naızaǵaı, burshaq, qatty jel, shańdy daýyl jáne +43°S-qa deıin qatty ystyq boljap otyr, dep habarlady «Qazgıdromet» RMK.