Abaı oblysynda jańadan salynǵan tasjolǵa aýyr júk kólikteri aıtarlyqtaı zıan keltirýde. Bul týraly «QazAvtoJol» ulttyq kompanıasynyń ókilderi habarlady. Osyǵan baılanysty kompanıa tasymaldaýshylardy belgilengen normalardy saqtaýǵa shaqyrdy, dep habarlaıdy NUR.KZ.
«QazAvtoJol» resmı Telegram-arnasynda bul Taldyqorǵan – Qalbataý – Óskemen respýblıkalyq mańyzy bar jolǵa qatysty ekenin, ol áli kepildik qyzmet kórsetýde turǵanyn atap ótti. Mamandardyń aıtýynsha, jańa trassa aýyr júk kólikteriniń turaqty qozǵalysy saldarynan joǵary júktemege ushyraýda. Ótken jyldan beri monıtorıń barysynda iri ınfraqurylymdyq jobany júzege asyrý úshin jol-qurylys materıaldaryn tasymaldaıtyn aýyr júk kólikteriniń qarqyndy qozǵalysy tirkelýde.
Mundaı áserdiń saldaryn joıýǵa týra kelýde. Bıylǵy kóktemde kepildik mindettemeler aıasynda 5 800 sharshy metr asfáltbeton jabyny qalpyna keltirildi. Tamyz aıynda ýchaskeniń 720-760 shaqyrymynda júrgizilgen kezekti tekserý taǵy shamamen 4 500 sharshy metr jabyndy jóndeý qajettigin kórsetti. Jumys 25 tamyzda bastalyp, 1 qyrkúıekke qaraı 2 600 sharshy metr qalpyna keltirildi. Anyqtalǵan aqaýlardy tolyq joıý 5 qyrkúıekke deıin aıaqtalýy josparlanýda.
Osylaısha, qysqa merzim ishinde jóndeý máselesi 10 myń sharshy metrden astam jańa jol tósemin qamtydy. Aqaýlardyń paıda bolýynyń negizgi faktorlarynyń biri – aýyr júk kólikteriniń qozǵalysy. Ásirese, oske túsetin ruqsat etilgen júktemeni júıeli túrde asyrýdyń joıqyn áseri bar: bul koleılikke, yǵysýlarǵa jáne basqa da deformasıalarǵa ákelip, jol tóseminiń qyzmet etý merzimin aıtarlyqtaı qysqartady, dep atap ótti «QazAvtoJol».
Jaǵdaıdy baqylaý úshin 691 jáne 783 shaqyrymdarda kólik quraldarynyń salmaq-kólem parametrlerin ólsheıtin avtomattandyrylǵan stansıalar ornatylǵan. Kompanıa sondaı-aq múddeli uıymdar men temirjol jelisiniń qurylysyna qatysýshylar aldynda salmaq normalaryn saqtaý máselesin turaqty túrde kóteredi.
Kompanıa qurylys materıaldaryn tasymaldaıtyn uıymdar men júk kóligi ıelerine belgilengen salmaq pen ostik parametrlerdi saqtaýdy qatań suranyspen júgindi. Artyq júk bir reıste kóbirek tasymaldaýǵa múmkindik beredi, biraq onyń saldary jolda koleılik, deformasıa jáne merziminen buryn jóndeý túrinde qalady, dep eskertti tasymaldaýshylarǵa.