Qostanaı oblysy Mendiqara aýdanynyń avtogreıder mashınısi Jeńis Jumabaev Máskeý mańynda ótken jol-qurylys salasy mehanızatorlarynyń halyqaralyq chempıonatynda úzdik ondyqqa endi, dep habarlaıdy infohub.kz.
Jarysqa Reseı, Qazaqstan, Belarýs jáne Qytaıdan 182 maman qatysty.
Jumabaev halyqaralyq týrnırge Qazaqstannyń úzdik avtogreıder mashınısi dep tanylǵan ulttyq baıqaýda jeńiske jetkennen keıin attandy. Alaıda start aldynda tapsyrmalardy tolyǵymen djoıstıkpen basqarylatyn beıtanys greıderde oryndaý kerek ekeni belgili boldy.
«Eshkim qandaı tapsyrma men tehnıka bolatynyn aıtqan joq. Keldik, greıder tolyǵymen djoıstıkte. Mashınamen tanysýǵa 10 mınýt berildi. Men shok boldym», — dep áńgimeledi ol.
Avtogreıder mashınısiniń jumysy bolashaq joldyń profıline áser etedi. Birneshe santımetrlik qatelik materıaldar shyǵyny men jabynnyń beriktigine áser etedi, sondyqtan jarysta eń aldymen tehnıkany basqarý dáldigi baǵalanady.
Qatysýshylar «jylan» jolynan ótip, shekteýishterge tımeı otvalmen fıshkalardy qulatyp, keri júrispen manevrler jasap, avtogreıderdi shartty angarǵa kirgizýi kerek boldy.
Jumabaev 42 jasta. Ol jol tehnıkasynda 17 jasynan beri jumys isteıdi, al avtogreıder rýline alǵash ret 23 jasynda otyrǵan. Qazir «KAJservıs» JSHS Mendiqara jol paıdalaný kásipornynda eńbek etedi.
Mehanızatordyń aıtýynsha, mundaı tehnıkany basqarýǵa kópjyldyq tájirıbe kómektesedi.
«Men mashınany búkil denemmen sezinemin. Diriline, otval pozısıasynyń eń az ózgerýine, tehnıkanyń qalaı jaýap beretinine qaraı», — dep túsindirdi Jeńis.
Jaqyn arada kásiporyn tehnıka parkin jańartady, al Jumabaev úırenshikti GS-1402-den jańa Shantui-ge aýysady.
Buǵan deıin Kýrsıv Avto QTJ poıyz mashınısiniń quramdy toqtatyp, joldarda bes jasar balany qutqarǵany týraly jazǵan bolatyn.