Qazaqstanda avtolızıng sharttary boıynsha syıaqynyń jyldyq tıimdi mólsherlemesiniń shekti mólsheri belgilendi: eń joǵary kórsetkish kólik qunyna baılanysty jáne jylyna 46%-ǵa jetýi múmkin, dep habarlaıdy infohub.kz saıty.
Tıisti parametrler Qazaqstan Respýblıkasy Ónerkásip jáne qurylys mınıstrliginiń buıryǵymen bekitilgen. Jeke tulǵalarǵa arnalǵan avtolızıng baǵdarlamasy elde 2025 jyldyń sońynda iske qosylǵan bolatyn, endi kólikterdi lızıńke beretin kompanıalar belgileı alatyn shekti paıyzdyq mólsherlemeler belgili boldy.
Buıryqqa sáıkes, syıaqynyń shekti jyldyq tıimdi mólsherlemesi kólik qunyna qaraı saralanǵan. Quny 20 mln teńgeden aspaıtyn kólikter úshin ol jylyna 36%-dan aspaýy tıis. Quny 20 mln teńgeden joǵary avtomobılder úshin shekteý jylyna 46% quraıdy. Al eger lızıń berýshi bank bolsa, shekti mólsherleme jylyna 35%-ben shektelgen.
Syıaqy mólsherlemesinen bólek, klıent úshin qorytyndy somaǵa ótinimdi qaraý komısıasy men bastapqy avanstyq tólem kiredi. Sonymen qatar, avtomobılge qyzmet kórsetý jáne ózge de yqtımal shyǵystar tolyǵymen klıentke júkteledi. Shart talaptaryn buzǵany úshin aıyppul qarastyrylǵan.
Avtolızıng mehanızmi bylaısha jumys isteıdi: kompanıa avtomobıl satyp alyp, ony klıentke ýaqytsha paıdalanýǵa beredi, azamat kólik úshin belgili bir merzim ishinde tólem jasaıdy, al shart aıaqtalǵanda avtokólik ıesiniń eki nusqasy bar — kólikti lızıń berýshige qaıtarý nemese qaldyq quny boıynsha satyp alý.
Bastapqyda bul mehanızm avtokredıtterge tıimdi balama bolady dep kútilgen. Alaıda avtolızıng halyq arasynda tanymal bolmady: kóptegen azamattar úshin ol qalta kóteretin sharýa emes.