2026 jylǵy Azıa oıyndaryna qatysatyn Qazaqstan áıelder boks quramasynyń túpkilikti quramy belgili boldy. Barlyq sportshylardyń jaǵdaıy tamasha, jaraqattary joq, al bapkerler shtaby komandanyń sátti óner kórsetýine úlken úmit artyp otyr, dep habarlaıdy infohub.kz.
Quramanyń bas bapkeri Eldos Saıdalın Ulttyq olımpıadalyq komıtetke bergen suhbatynda qurlyqtyq birinshilikte el namysyn qorǵaıtyn sportshy qyzdardyń esimderin atady. 51 kelige deıingi salmaq dárejesinde Alýa Balkıbekova, 54 kelige deıin — Nazym Qyzaıbaı, 60 kelige deıin — Vıktorıa Grafeeva, 65 kelige deıin — Aıda Abıkeeva, al 75 kelige deıin — Natalá Bogdanova óner kórsetedi.
«Qatysýshylar tizimin jasaý kezinde ótken jylǵy álem chempıonatynyń nátıjeleri, sondaı-aq bıylǵy maýsymdaǵy álem kýbogy kezeńderiniń qorytyndylary eskerildi», — dedi Saıdalın.
Maman áıelder boksy Azıada qarqyndy damyp kele jatqanyn, al qazaqstandyq komandanyń basty básekelesteri qatarynda Úndistan men Qytaı quramalaryn atady.
«Qazir bizdiń komanda AQSH-ta oqý-jattyǵý jıynyn ótkizip jatyr. 4 tamyzda Qazaqstanǵa qaıtamyz. Odan keıin sportshylar jeke baǵdarlama boıynsha daıyndalyp, azdap demalyp alady. Kelesi jıyn 16 tamyzda bastalady. Oǵan Reseı men AQSh quramalary qatysady. Al 9 qyrkúıekte Japonıaǵa attanamyz, onda daıyndyqtyń qorytyndy kezeńi ótedi. Beıimdelýden ótip, oıyndarǵa daıyndalamyz», — dedi bapker.
Onyń aıtýynsha, qazaqstandyq sportshy qyzdardyń kóńil kúıi jaqsy, jaraqattary joq. Komanda Azıada-2026-da sátti óner kórsetýge senimdi.