Japonıada ótip jatqan XX Jazǵy Azıa oıyndarynyń sońǵy tolyqqandy medal kúninde Qazaqstan quramasy qorjynyn jeti túrli medalmen tolyqtyrdy. Alaıda juma kúninen ózgeshe, bul kúni qazaqstandyq sportshylar altyn medal jeńip ala almady, dep habarlaıdy infohub.kz saıty.
Azıada-2026-nyń vıse-chempıondary atanǵan úsh qazaqstandyq: 85 kelige deıingi salmaq dárejesinde óner kórsetetin jıý-jıtsý sheberi Mereı Qabdýllaev, aralas komandalyq týrnırdegi dzúdoshylar, sondaı-aq sý polosynan erler quramasy.
Ulttyq komanda qorjynyna qola medaldardy toptyq kópsaıystaǵy gımnastshylar — Jasmın Júnisbaeva, Aıda Hakımjanova, Madına Myrzabaı, Aızere Nurmaǵambetova jáne Krıstına Chepýlskaıa fınalda úshinshi oryn alyp ákeldi. Marıan Jýravleva 63 kelige deıingi salmaqta jıý-jıtsýden qola jeńip aldy. Úshinshi satyǵa sondaı-aq erkin kúresten Nurqoja Qaıpanov (74 kg) jáne áıelder kúresinen Nılýfar Raımova (57 kg) kóterildi.
Raımovanyń áıelder kúresi quramasyndaǵy qurbysy Shuǵyla Ómirbek 53 kelige deıingi salmaqta qolaǵa bir qadam jetpeı qaldy. Kórkem gımnastıkadan jeke kópsaıys fınalynda tórtinshi oryndy Aqmaral Erekesheva ıelense, osy dısıplınada Aıbota Ertaıqyzy besinshi boldy.
Taekvondoshylar Samırhon Ababakırov pen Beıbarys Qablan óz ónerlerin shırek fınal satysynda aıaqtady. Toǵjan Qaznabek pen Nazym Mahmýtova 1/8 fınal kezeńinde jarystan shyǵyp qaldy.
Qazaqstannyń áıelder regbı-7 quramasy qorytyndy besinshi oryndy ıelense, erler komandasy onynshy orynda márege jetti. On birinshi orynda Azıadany qazaqstandyq voleıbolshylar aıaqtady.
Azıa oıyndarynyń on tórtinshi kúninen keıin Qazaqstan quramasy beıresmı medal esebinde segizinshi oryndy saqtap qaldy. Jalpy esepte joǵary kóterilý endi múmkin emes, óıtkeni oıyndardyń sońǵy kúni tek konkýrdan ǵana jarys ótedi.
Japonıadaǵy XX Jazǵy Azıa oıyndary 19 qyrkúıekte resmı túrde ashylyp, 4 qazanda aıaqtalady. 45 eldiń sportshylary qatysatyn keshendi jarystarda 460 medal jıyntyǵy sarapqa salynady: 217 — erler arasynda, 204 — áıelder arasynda jáne 39 — aralas razrádtarda. Azıada-2026-da Qazaqstan quramasynyń quramynda 35 sport túrinen 558 sportshy óner kórsetedi.