Almatyda Qaırat Satybaldyulynyń ulyna tıesili «Baısat» bazary satyldy. Saýda-sattyq birneshe sátsiz áreketten keıin sátti ótip, mámile somasy 24 772 753 285 teńgeni qurady, dep habarlaıdy infohub.kz saıty.
Elektrondyq saýda alańynyń derekterine sáıkes, aýksıon búgin, 7 tamyzda, saǵat 12:00-de ótti. Saýdaǵa «Kóterme jáne bólshek saýda ortalyǵy» JSHS-niń 100% jarǵylyq úlesi qoıyldy. Bastapqy baǵa satýdyń sońǵy qunymen sáıkes keldi.
Jobanyń sıpattamasynda kásiporyn qyzmetkerleriniń ortasha jyldyq sany 64 adamdy quraıtyny kórsetilgen. Satýshy retinde Qaıtarylǵan aktıvterdi basqarý kompanıasy shyqty. Satyp alýshynyń aty-jóni ashylmaıdy.
Aıta ketý kerek, «Baısat» birinshi ret satylyp otyrǵan joq. Buǵan deıin nysan jeltoqsan aıynda qaıtalama saýdaǵa shyǵarylǵan bolatyn, ol kezde baǵasy 26 706 317 643 teńge bolǵan. Odan da erterek quny 28 mlrd teńgege jetken.
Sondaı-aq, satyp alýshylar bolmaǵan jaǵdaıda bazar qalanyń komýnaldyq menshigine berilýi múmkin ekendigi habarlanǵan bolatyn. Eske salaıyq, sotqa deıingi tergeý aıasynda Qaırat Satybaldyuly «Baısat» bazarynyń úlken bóligin óz erkimen qaıtarǵan, al onyń ulyna tıesili bóligi memleket menshigine qaıtarylǵan edi. Bul týraly buǵan deıin Almaty prokýratýrasy habarlaǵan.