Kóptegen ata-ana baldy paıdaly tátti dep sanaıdy, alaıda ol bir jasqa deıingi balaǵa eleýli qaýip tóndirýi múmkin. Almatylyq 25 jyldyq tájirıbesi bar pedıatr-ınfeksıonıst Sáýle Syrǵabaeva Threads áleýmettik jelisinde baldyń nárestelerge tıgizetin yqtımal saldary týraly aıtyp berdi, dep habarlaıdy infohub.kz.
«Nege baldan keıin náreste basyn ustaı almaı qalady? Bári balda jasyrynýy múmkin botýlızm sporalarynda», – dep jazdy ol.
Dáriger eresekterdiń ishegi jetilgen, sondyqtan sporalar ónip shyǵa almaıdy – olar tranzıtpen ótip, tabıǵı jolmen shyǵarylady. «Al bir jasqa deıingi náresteniń ishegi áli bos deýge bolady, mıkroflora qalyptaspaǵan, sondyqtan sporalar ishektiń ishinde ónip, sol jerde toksın shyǵara bastaýǵa múmkindik alady», – dep túsindirdi maman.
Pedıatrdyń aıtýynsha, budan keıin toksın júıkeden bulshyqetke sıgnal berýdi bloktaıdy. Eń aldymen moıyn, bet jáne jutyný bulshyqetteri zardap shegedi. «Qorytyndy: baldy kez kelgen túrde (tipti pisirilgen taǵamdarda, úıde jasalǵan tosaptarda, emizikke jaǵyp, sútpen qosyp) 12 aıǵa deıin berýge bolmaıdy. Tynysh kútip, bir jasqa tolǵan soń balany balmen tanystyramyz», – dep keńes berdi ol.
Eske salaıyq, aýrý baldy tutynǵannan keıin birneshe saǵattan eki aptaǵa deıingi aralyqta baıqalýy múmkin. Negizgi belgiler: qatty jáne uzaqqa sozylǵan ish qatý; jalpy bulshyqet álsizdigi (bala «bos» kórinedi); enjarlyq, tábettiń joǵalýy jáne jutynýdyń qıyndaýy, álsiz aıqaı; náreste basyn senimdi ustaı almaıdy.
Buǵan deıin pedıatr Nurjamal Áýbákirova Instagram-daǵy paraqshasynda balalarǵa qazirgi klınıkalyq usynystarǵa qaramastan jıi taǵaıyndalatyn alty tanymal dárihanalyq preparatty ataǵan bolatyn.