Kókshetaýda sergek jasóspirimder polısıa qyzmetkerlerine yqtımal aýyr zardaptardyń aldyn alýǵa kómektesti, dep habarlaıdy infohub.kz saıty.
Oqıǵa 4 tamyzda saǵat 19:00 shamasynda boldy. «102» arnasyna qaladaǵy qoǵamdyq oryndardyń birinde belgisiz er adamnyń agressıvti áreket etip, qoǵamdyq tártipti buzǵany týraly habarlama tústi. Aqmola oblysy polısıa departamentiniń baspasóz qyzmetiniń málimetinshe, qońyraýǵa jaqyn mańdaǵy patrúldik polısıa ekıpajy dereý shyqqan.
Oqıǵa ornyna kelgen qyzmetkerler qońyraý shalǵandardyń jasóspirimder ekenin anyqtady. Olar bolǵan oqıǵaǵa nemquraıly qaramaı, polıseılerge tártip buzýshyny kórsetip, er adamnyń qatty masań kúıde bolǵanyn, agresıa tanytyp, tipti serigine qol kótergenin aıtty.
Ustaý kezinde er adam baǵynbaýshylyq tanytty: qatty balaǵattap, polısıa qyzmetkerleriniń zańdy talaptaryna jaýap bermedi jáne medısınalyq kýálandyrýdan ótýden bas tartty. Oǵan qatysty quqyq qorǵaý organy qyzmetkeriniń zańdy talabyna baǵynbaǵany úshin ákimshilik is qozǵaldy. Medısınalyq kýálandyrý qorytyndysy boıynsha ortasha dárejedegi masań kúıde bolǵan onyń serigi qoǵamdyq orynda mas kúıinde júrgeni úshin ákimshilik jaýapkershilikke tartyldy.
Ýaqytsha ustaý ızolátoryna jetkizilgennen keıin ustalǵan adam quqyqqa qarsy áreketin jalǵastyryp, IÝ-daǵy rakovınany syndyrdy. Múlikke zaqym keltirgeni úshin ol usaq buzaqylyq boıynsha ákimshilik jaýapkershilikke tartyldy. Sonymen qatar, sot er adamǵa qatysty bılik ókilin qorlaý faktisi boıynsha qylmystyq is qozǵaý týraly sheshim qabyldady. Qazir ol ýaqytsha ustaý ızolátorynda otyr.
Keıin belgili bolǵandaı, sol kúni er adam men áıel resmı túrde nekelerin tirkegen. Rásimnen keıin jubaılar bul oqıǵany atap ótýdi uıǵarǵan, alaıda аlkogóldi ishimdik ishý janjalǵa ákelip, polısıanyń aralasýymen aıaqtalǵan.
Aqmola oblysynyń PD baspasóz qyzmeti balalardyń ýaqtyly qońyraýy quqyqqa qarsy áreketterdi jedel toqtatýǵa jáne, múmkin, aýyr zardaptardyń aldyn alýǵa múmkindik bergenin atap ótti. Sondaı-aq, ustalǵan adamnyń buryn jasaǵan qylmysy úshin bas bostandyǵynan aıyrý oryndarynan jaqynda bosaǵany anyqtaldy.