«Kompas ı KO» kompanıasy Qaraǵandy oblysyndaǵy Balqash qalasynyń jerinde ornalasqan Qyzylbolat ýchaskesinde shashylma altyn men basqa da qundy metaldardy geologıalyq barlaý jumystaryn júrgizýdi josparlap otyr, dep habarlaıdy infohub.kz saıty.
Altynnan bólek, ýchaskede kúmis pen platınany da izdeý kózdelgen. Aýmaq jalpy kólemi 28,3 sharshy shaqyrym bolatyn 12 blokty qamtıdy. Kompanıa qundy metaldardyń qoryn «Altynalmastyń» jumys istep turǵan ken oryndarynyń mańynan tabýdy kózdep otyr.
Jumystardy 2027 jyldyń sáýirinen qazanyna deıin jáne 2028 jyldyń sáýirinen qazanyna deıin qosa alǵanda júrgizý josparlanýda. Barlaý barysynda tereńdigi 5 metrge, eni 2 metrge deıingi orlar qazylady. Sonymen qatar kompanıa ýchaskeniń túrli bólikterinde ortasha tereńdigi 50 metr bolatyn 60 uńǵyma burǵyzýdy nıet etip otyr.
Barlaý ýchaskesiniń mańynda «Altynalmas» kompanıasynyń Dolınnoe jáne Pýstynnoe kenishteri ornalasqan. Ýchaskege eń jaqyn eldi meken – batysqa qaraı 40 km jerdegi Aqjaılaý aýyly.
«Kompas ı KO» kompanıasy AHQO alańynda 2026 jyldyń aqpanynda qurylǵan. Ol Ge Szán men Dýlat Omarov ıelenetin Economic and Environmental Cooperation Organization Ltd kompanıasyna tıesili. Ge Szánge tórt kompanıa – «Azıatskaıa kompanıa natýralnoı edy», «Fınansovaıa korporasıa g. Astany» jáne taǵy bir óndirýshi kompanıa qaraıdy. Sondaı-aq ol taǵy jeti zańdy tulǵany basqarady.
Buǵan deıin «Jańa Mys» kompanıasy Abaı oblysynyń Aıagóz aýdanyndaǵy 50 bloktan turatyn ýchaskede geologıalyq barlaý jumystaryn bastaıtyny habarlanǵan. Onda Solidcore Resources quramyna kiretin kompanıa altyn men mys tabýdy úmit etip otyr.