Astanalyq hokeı klýby «Barys» Ófide ótip jatqan Bashqurtstan Respýblıkasy Kýbogynyń maýsym aldyndaǵy týrnırinde sátsiz bastady. Mıhaıl Kraves shákirtteri alǵashqy machta muz ıeleri — ófilik «Salavat Iýlaevtan» 1:4 esebimen utylyp qaldy, dep habarlaıdy infohub.kz saıty.
Týrnırdiń alǵashqy oıyn kúni Habarovskilik «Amýr» men toláttılik «Lada» arasyndaǵy kezdesýmen ashyldy. Qıyr Shyǵys komandasy qarsylasyn bes jaýapsyz shaıbamen (5:0) senimdi túrde tize búktirdi. Sodan keıin Kýboktyń saltanatty ashylý rásimi ótip, odan soń muzǵa «Salavat Iýlaev» pen «Barys» shyqty.
Muz ıeleri 15-mınýtta sandyq artyqshylyqty paıdalanyp esep ashty: Maksım Kýznesov gol soqty. Birinshi kezeńniń sońyna deıin astanalyqtar esepti teńestire aldy — Alıhan Ómirbekov amerıkalyq Cheıs Prıskı men Madı Dıhanbektiń qatysýymen jasalǵan kombınasıany nátıjeli aıaqtap, 1:1 esebin ornatty. Alaıda úzilisten keıin ófilikter taǵy da artyqshylyqty sátti paıdalandy, al mach sońynda Andreı Shýtovtyń qaqpasyna taǵy eki ret gol soǵyp, esepti iri — 4:1-ge jetkizdi.
Aıta ketý kerek, «Barys» dástúrli túrde maýsymǵa daıyndyqty Astanadaǵy oqý-jattyǵý jıyndarynan bastady. Komandaǵa jańa oıynshylar qosyldy, biraq Ófige negizgi quramnyń barlyq oıynshylary jete almady. Amerıkandyqtar Djastın Beılı men Meıson Morellı qajetti qujattardy rásimdep jatyr, al Alıhan Ásetov jaraqatynan keıin jeke baǵdarlama boıynsha qalpyna kelýde.
Bapkerler shtaby men oıynshylar aldaǵy maýsymǵa komanda kapıtanyn anyqtady — ol Kırıll Savıskı bolady. Kapıtannyń kómekshileri bolyp Djeık Massı, Samat Danıar jáne joǵaryda atalǵan Meıson Morellı taǵaıyndaldy.
Týrnırdiń kelesi machynda, erteń, 18 tamyzda «Barys» habarovskilik «Amýrmen» kezdesedi. Al jarystyń sońǵy kúni, 20 tamyzda astanalyqtar toláttılik «Ladamen» synǵa túsedi.
Eske salaıyq, ófilik maýsymaralyq týrnır alǵash ret 1999 jyly «Salavat Iýlaev» hokeı klýbynyń júldelerine arnalǵan týrnır» degen atpen ótkizilgen bolatyn. 2001 jyldan 2012 jylǵa deıin ol «Bashqurtstan Respýblıkasy Prezıdentiniń Kýbogy» dep ataldy, al 2012 jyldan bastap qazirgi ýaqytqa deıin Bashqurtstan Respýblıkasy Kýbogy dep atalady.
Týrnır ıeleri bas júldeni 12 ret jeńip aldy. Qalǵan komandalar arasynda eń jıi ıaroslavldik «Lokomotıv» jeńimpaz atandy (3 ret), al «Avangard», «Ak Bars», «Lada», «Molot-Prıkame», «Neftehımık», SKA, «Iýgra», «Severstal» jáne slovakıalyq «Skalısa» bir-bir ret jeńiske jetti. «Barys» 2018 jyly Ófidegi týrnırde tórtinshi oryn aldy.