Qazaqstan premer-mınıstri Oljas Bektenov jańa oqý jyly bastalǵanǵa deıin 100-den astam mekteptegi jóndeý jumystaryn aıaqtaýdy tapsyrdy. Bul týraly 18 tamyzdaǵy úkimet otyrysynda málimdeldi, dep habarlaıdy infohub.kz saıty.
Úkimet basshysy óz sózinde 1 qyrkúıekte 47 jańa mekteptiń esigin ashatynyn, onyń 20-sy «Keleshek mektepteri» jobasy aıasynda salynǵanyn atap ótti. Ol óńir ákimdikterine oqý ordalarynyń oqý jyly bastalǵanǵa deıin tolyq fýnksıonaldyq daıyndyǵyn qamtamasyz etýdi tapsyrdy.
«Óńirler 2026 jyldyń sońyna deıin taǵy 64 mekteptiń qurylysyn aıaqtaýy qajet. Qazirdiń ózinde olardy pedagogtarmen jáne oqý-tehnıkalyq bazamen qamtamasyz etýdiń barlyq máselelerin sheshý kerek. 1 qyrkúıekke deıin elimizdegi 106 mektepte kúrdeli jáne aǵymdaǵy jóndeý jumystaryn aıaqtaý talap etiledi», — dep atap ótti Bektenov.
Premer birqatar óńirdegi, onyń ishinde Almaty, Abaı oblysy, Aqmola, Batys Qazaqstan jáne basqa da aımaqtardaǵy 13 mekteptegi jumys qarqynynyń tómendigine nazar aýdardy. Ol osy óńirlerdiń ákimderine jóndeý jumystaryn belgilengen merzimde aıaqtaýdy jeke baqylaýǵa alýdy tapsyrdy.
Sonymen qatar, bıylǵy 1 qyrkúıekke deıin fızıka, hımıa, bıologıa jáne robototehnıka pánderi boıynsha 500 pándik kabınet satyp alýdy qamtamasyz etý qajet. Jyl sońyna deıin elimizdiń mektepterinde 1400-den astam arnaıy kabınet ornatý kerek. Birqatar óńir qarjylandyrý máselelerin qysqa merzimde sheshýi tıis.
Sondaı-aq premer kabınetterge qajetti qural-jabdyqtardy jedel satyp alý úshin barlyq rásimderdi jyldamdatýdy tapsyrdy.