Qazaqstan Premer-mınıstri Oljas Bektenov maýsymaralyq kezeńde áleýmettik mańyzy bar kókónis ónimderiniń tapshylyǵyna jol bermeýdi jáne baǵanyń qymbattaýyn boldyrmaýdy tapsyrdy, dep habarlaıdy infohub.kz saıty.
Úkimettiń baspasóz qyzmeti málimdegendeı, bul úshin Qazaqstan óńirlerinde qysqy jáne kóktemgi kezeńge kókónis qorlary jasaqtalady. Úkimet kókónis ónimderiniń qysqy jáne kóktemgi kezeńge arnalǵan qorlaryn qalyptastyrý jumystaryn kúsheıtedi.
«Basym baǵyt – qysqy jáne kóktemgi kezeńge kókónis, ásirese kartop qorlaryn jasaqtaý. Egin jınaý naýqany barysynda qajetti kólemderdi ýaqytyly kelisimshartqa baılanystyryp, olardy satyp alýdy jáne saqtaýǵa qoıýdy uıymdastyrý mańyzdy. Óńirlerdiń ákimdikteri bul máseleni baqylaýǵa alyp, maýsymaralyq kezeńde áleýmettik mańyzy bar kókónis ónimderiniń tapshylyǵyna nemese baǵasynyń qymbattaýyna jol bermeýi kerek. Sonymen qatar, artyq ónimdi eksportqa baǵyttaǵan jón. Saýda jáne kólik mınıstrlikteri agrarlarǵa ótkizý naryqtaryn izdeýge jáne ónimdi satýǵa kómek kórsetýi tıis», – dep tapsyrdy úkimet basshysy.