Soltústik Qazaqstan oblysyndaǵy Beskól aýylynyń turǵyndary kózi ashylmaıtyn sasyq ıiske shaǵymdanýda, dep habarlaıdy infohub.kz saıty.

Almaty.tv telearnasynyń málimetinshe, qala mańyndaǵy Beskól aýylynyń turǵyndary osy kúnderi terezeni aıqara ashýdy armandaıdy, biraq jaz boıy tynys taryltatyn aýaǵa shydap, terezeni myqtap jaýyp qoıýǵa májbúr. Sebebi — mańaıdy jıi qaptaıtyn ótkir, ashshy ıis. Adamdardyń aıtýynsha, ásirese keshki ýaqytta sasyq ıis qatty seziledi.

«Úırekti, qazdy órtegende ǵoı, ıis osydan shyǵady, kóńnen de. Al kóń burynnan bar edi. Árıne, qıyn, men osy mańda turamyn. Kári anamdy qoltyǵynan demep, dalaǵa taza aýa jutýǵa shyǵaramyn. Munda qandaı taza aýa? Anam 100 jasta, balalar da solaı — úıge kirgende kıimderiniń bári sasyp turady», — dedi Beskól aýylynyń turǵyny Enshibaı Bashenov.

Basqa turǵyndar da onyń sózin rastaıdy.

«Úıdi jeldetý múmkin emes, óıtkeni shydamas ıis tur. Bul ne úırek qorasy, ne qus sańǵyryǵy, ne qaýyrsyn órteý — bilmeımin, biraq shydaý múmkin emes. Sasyǵan ıis. Buryn mundaı ıis bolǵan emes. Osyǵan birdeńe isteý kerek», — dep nalıdy Beskól aýylynyń turǵyny Madına Shopshıbaeva.

Bul qorqynyshty sasyq ıistiń qaıdan shyqqanyn eshkim naqty aıta almaıdy. Adamdar kúdigin jaqyn mańdaǵy kásiporyndarǵa aýdarýda. Yqtımal kózderdiń qatarynda birneshe qus fabrıkasy men proteın zaýyty bar, biraq bul ázirge tek joramal. Ásirese jaǵymsyz ıisten aýyldyń qart turǵyndary qatty zardap shegýde.

Turǵyndardyń turaqty shaǵymdaryna jergilikti bılik jaýap berdi. Sasyq ıistiń kózine qatysty óz úkimin tıisti qyzmetter shyǵarýy tıis.

«Birneshe kásiporyn — ıá. Iistiń qaıdan shyqqanyn bilmeımiz. Sondyqtan qazir anyqtaý kerek, komısıalyq túrde baryp, tekserip, osy jumystyń bárin júrgizý qajet», — dedi Beskól aýyldyq okrýginiń ákimi Baýyrjan Mýsın.

Sondaı-aq jýrnalıser turǵyndar kórsetken kásiporyndardyń biriniń ókilderine júgindi. Biraq ol jerde barlyq kúdikti joqqa shyǵardy.

«Biz eshqandaı ólekse órtemeımiz. Bizde barlyq tıisti qujattar, kelisimsharttar bar. Qaıta óńdeýge tapsyramyz. Óz tarapymyzdan kez kelgen tekserýge daıynbyz», — dedi kásiporyn ókili Maǵjan Áýke.

Endi bul oqıǵaǵa komısıa núkte qoıýy tıis. Ol Beskóldegi aýany naqty ne búldirip jatqanyn jáne buǵan kásiporyndardyń kinási bar-joǵyn anyqtaýy kerek. Eger sasyq ıistiń sebebi tabylmasa, turǵyndar bul máseleni joǵary organdarǵa jetkizýdi kózdep otyr.