Qazaqstan men Binance halyqaralyq tólemder men aýdarymdarǵa arnalǵan aımaqtyq esep aıyrysý habyn damytý týraly kelisti. Tıisti memorandýmǵa QR Ulttyq banki men halyqaralyq kompanıa qol qoıdy, dep habarlaıdy infohub.kz saıty.
Ulttyq banktiń málimetinshe, qujatqa bank tóraǵasynyń orynbasary Bınur Jalenov pen Binance jahandyq keńsesiniń aımaqtyq damý jáne operasıalyq qyzmet jónindegi basshysy Kırıll Homákov qol qoıdy. Rásimge Ulttyq bank tóraǵasy Tımýr Súleımenov pen Binance negizin qalaýshy Chanpen Chjao qatysty.
Bolashaq hab halyqaralyq tólemder men aqsha aýdarymdaryn júzege asyrýǵa baǵyttalady, onyń ishinde Ortalyq Azıa, TMD jáne Shyǵys Eýropa elderindegi Binance klıentteriniń sıfrlyq aktıvtermen operasıalary boıynsha esep aıyrysýlar da qamtylady.
Joba aıasynda Qazaqstanda Binance tobynyń tıisti uıymyn qurý jáne Ulttyq banktiń birinshi sanattaǵy tólem uıymy retinde qyzmetti júzege asyrýǵa lısenzıasyn ala otyryp, qajetti ınfraqurylymdy jasaý josparlanýda, dep atap ótti eldiń ortalyq bankinde.
Qazaqstanda jobany iske qosý sıfrlyq aktıvterdi retteý salasyndaǵy reformalar men qarjy naryǵynyń jańa sýbektisi – birinshi sanattaǵy tólem uıymyn engizýden keıin múmkin boldy. Jańa erejeler halyqaralyq kompanıalardyń qatysýyn keńeıtýge jáne ınovasıalyq tólemdik jáne qarjylyq servısterdi damytýǵa múmkindik beredi.
Binance jańa retteý aıasynda jobany iske asyra bastaǵan alǵashqy jahandyq kompanıalardyń biri boldy. Binance-tiń aımaqtyq operasıalarynyń bir bóligi Qazaqstanǵa aýystyrylady dep kútilýde. Bul kompanıanyń aımaqtaǵy klıentteriniń edáýir bóligine qazaqstandyq ıýrısdıksıa arqyly qyzmet kórsetýge, sondaı-aq elge halyqaralyq tehnologıalyq quzyretterdi tartýǵa múmkindik beredi.
Ulttyq bankte joba sıfrlyq qarjylyq qyzmetter eksportyn damytýǵa jáne Qazaqstannyń sıfrlyq qarjy tehnologıalarynyń aımaqtyq ortalyǵy retindegi rólin nyǵaıtýǵa yqpal etedi dep sanaıdy. Memorandýmǵa qol qoıý Qazaqstannyń sıfrlyq qarjy ınfraqurylymyn damytý jáne eldiń jahandyq qarjy júıesine ıntegrasıalanýy jolyndaǵy taǵy bir qadam boldy.