Qazaqstanda Biryńǵaı boryshkerler tizilimin júrgizý qaǵıdalary ázirlendi. Atqarýshy is júrgizý boıynsha barlyq boryshkerler elektrondy derekqorǵa avtomatty túrde engiziletin bolady, dep habarlaıdy infohub.kz saıty.
Ádilet mınıstrligi 10 tamyzdaǵy buıryǵymen Biryńǵaı boryshkerler tizilimin júrgizý qaǵıdalaryn bekitti. Tizilim memlekettik sıfrlyq atqarýshy is júrgizý júıesinde qalyptastyrylyp, jańartylyp otyrady. Atqarýshy is qozǵalǵannan keıin boryshker týraly málimetter tizilimge avtomatty túrde engiziledi. Bul ońaılatylǵan tártippen qozǵalǵan isterge de qatysty.
Boryshkerler týraly aqparat ýákiletti organnyń resmı saıtynda qoljetimdi bolady.
Qaǵıdalarda adamdy nemese kompanıany Biryńǵaı boryshkerler tizilimine engizýdiń birneshe negizi qarastyrylǵan: atqarýshy is nemese ońaılatylǵan is qozǵaý; merzimdi tólemder boıynsha atqarýshy qujattardaǵy bereshek úsh aıdan astam; balamen qarym-qatynas tártibin retteıtin atqarýshy qujat talaptaryn dáleldi sebepsiz birneshe ret oryndamaý. Mundaı buzýshylyq qatarynan eki retten astam bolýy tıis.
Bul rette talapty qamtamasyz etý sharalaryn qabyldaý nemese keri qaıtarýǵa baılanysty atqarýshy qujattar tizilimge engizilmeıdi.
Tizilimde boryshkerdiń aty-jóni nemese uıymnyń ataýy kórsetiledi. Sondaı-aq atqarýshy qujatty bergen organ, onyń berilgen kúni jáne oryndalmaǵan mindettiń mazmuny týraly aqparat kórsetiledi. Sonymen qatar, tizilimde málimetterdi bergen sot oryndaýshysynyń derekteri, sondaı-aq aýmaqtyq ádilet bólimshesiniń ataýy men mekenjaıy nemese jeke sot oryndaýshysynyń keńsesiniń mekenjaıy kórsetiledi.
Málimetterdi alyp tastaý sot oryndaýshysynan elektrondy qujat aınalymy júıesi arqyly tıisti aqparat alynǵannan keıin úsh jumys kúni ishinde júzege asyrylady. Boryshker zańda kózdelgen jaǵdaılarda atqarýshy is toqtatylǵannan keıin tizilimnen shyǵarylýy tıis. Sondaı-aq negiz merzimdi tólemder boıynsha bereshektiń bolmaýy nemese balamen qarym-qatynas tártibi týraly qujat talaptaryn qatarynan eki jáne odan da kóp ret oryndaý bolyp tabylady. Eger boryshker qujat talaptaryn oryndasa, atqarýshy is aıaqtalǵannan keıin de alyp tastaý múmkin. Sondaı-aq, atqarýshy qujat buryn óndirip alýshyǵa qaıtarylǵan bolsa, ony májbúrlep oryndaýǵa usyný merzimi ótkennen keıin boryshkerdi tizilimnen shyǵarý jeke kózdelgen.
Aýmaqtyq organ sıfrlyq júıege engizilgen atqarýshy is júrgizý derekteri men sot oryndaýshysy usynǵan rastaıtyn qujattar negizinde sheshim qabyldaıdy. Eger alyp tastaý úshin negizder jetkiliksiz bolsa, aýmaqtyq organ sot oryndaýshysyna dáleldi bas tartýdy jiberýi tıis. Májbúrlep oryndaýǵa usyný merzimi ótken qujattar boıynsha boryshkerdi tizilimnen avtomatty túrde shyǵarý kózdelgen. Avtomatty túrde shyǵarylǵannan keıin júıe aýmaqtyq organnyń májbúrlep oryndaý sharalaryn keri qaıtarý týraly qaýlysyn qalyptastyrady.
Buǵan deıin Qazaqstan Prezıdenti sot oryndaýshylarynyń qyzmetin retteıtin birqatar túzetýlerge qol qoıǵan bolatyn. Sot tártibimen qaryzdary óndiriletin qazaqstandyqtardyń quqyqtary jaqsyraq qorǵalatyn bolady.