Bozjyra shatqalynda túsirilgen janjaldy vıdeo resmı tekseriske ulasty: Mańǵystaý oblystyq polısıa departamenti kameraǵa dáret syndyrǵan sheteldik qyzdyń jeke basyn anyqtap, materıaldardy Syrtqy ister mınıstrligine joldady, dep habarlaıdy infohub.kz saıty.
Kanadalyq vıdeograf Olessia Pliousnina laqap atymen taraǵan kadrlar buǵan deıin áleýmettik jelilerde paıda bolǵan. Onda qyz Mańǵystaý oblysyndaǵy Bozjyra shatqalynyń aýmaǵynda dáret syndyrady. Instagram-daǵy túpnusqa jazba qazir qoljetimsiz, al onyń paraqshasyndaǵy vıdeony Halyqstan Telegram-arnasy jarıalaǵan.
Mańǵystaý oblystyq polısıa departamenti vıdeojazbany áleýmettik jelilerden tapqanyn málimdedi. Quqyq qorǵaýshylar sheteldik azamatshanyń jeke basyn anyqtap, onyń áreketin usaq buzaqylyq dep saralady.
«Polısıa qyzmetkerleri osy quqyq buzýshylyqty jasaǵan sheteldik azamatshanyń jeke basyn anyqtady. Tekserý barysynda kórsetilgen beınematerıaldardyń ol Qazaqstan aýmaǵynan shyqqannan keıin jarıalanǵany belgili boldy. Jasalǵan quqyq buzýshylyq boıynsha materıaldar tıisti dıplomatıalyq ókildikke jetkizý úshin Syrtqy ister mınıstrligine joldandy», — delingen habarlamada.
Aıtpaqshy, polısıa habarlaǵandaı, qazirgi tańda jarıalaý júrgizilgen áleýmettik jelidegi akkaýnt joıylyp, qoljetimsiz bolyp tur.
«Mańǵystaý oblystyq polısıa departamenti Qazaqstan Respýblıkasynyń zańnamasyn múltiksiz saqtaý qajettigin eske salady. Kez kelgen qoǵamdyq tártip buzýshylyq úshin jaýapkershilik qarastyrylǵan», — dep qosty DP-da.
Buǵan deıin biz mádenıet vıse-mınıstriniń Bozjyrada dáret syndyrǵan sheteldik qyz týraly pikir bildirgenin jazǵan bolatynbyz.