Qanat Bozymbaev Qazaqstan Respýblıkasy Premer-Mınıstriniń orynbasary qyzmetin jalǵastyrady. Tıisti jarlyqqa el Prezıdenti Qasym-Jomart Toqaev qol qoıdy, dep habarlaıdy infohub.kz saıty.
Aqordanyń resmı habarlamasynda: «Memleket basshysynyń Jarlyǵymen Bozymbaev Qanat Aldabergenuly Qazaqstan Respýblıkasy Premer-Mınıstriniń orynbasary bolyp taǵaıyndaldy», — delingen.
Premer-Mınıstr saıtyndaǵy málimetke sáıkes, Qanat Bozymbaev 1969 jyly Almatyda dúnıege kelgen. Ol Qazaq memlekettik basqarý akademıasyn bitirgen.
Eńbek jolyn 1993 jyly komersıalyq uıymda ekonomıs bolyp bastaǵan. 1994-1997 jyldary Almaty ákiminiń kómekshisi qyzmetin atqarǵan. 1997 jyly saýda-óndiristik birlestiktiń ekonomıkalyq máseleler jónindegi dırektory jáne QR Ekonomıka jáne saýda mınıstrliginiń óńirlik saıasat bóliminiń bastyǵy bolǵan.
1997-1998 jyldary — «QazTransOıl» munaı tasymaldaý ulttyq kompanıasy» AQ-nyń jıyntyq-qarjy departamentiniń dırektory, ekonomıkalyq máseleler jónindegi vıse-prezıdenti. 1998-2000 jyldary — QR Energetıka, ındýstrıa jáne saýda mınıstrliginiń munaı jáne gaz departamentiniń dırektory.
2000 jyly QR Energetıka, ındýstrıa jáne saýda mınıstriniń orynbasary boldy. 2001 jyly — «KEGOC» AQ-nyń birinshi vıse-prezıdenti, al 2001-2007 jyldary osy kompanıanyń prezıdenti qyzmetin atqardy. 2007-2008 jyldary «Samuryq» memlekettik aktıvterdi basqarý jónindegi qazaqstandyq holdıń» AQ basqarma tóraǵasy boldy, keıin 2008-2009 jyldary «KEGOC» AQ basqarma tóraǵasy qyzmetine qaıta oraldy.
2009-2013 jyldary Jambyl oblysynyń ákimi, 2013-2016 jyldary Pavlodar oblysynyń ákimi boldy. 2016-2019 jyldary QR Energetıka mınıstri qyzmetin atqardy. 2019-2021 jyldary — QR Prezıdentiniń kómekshisi. 2021-2022 jyldary — Almaty oblysynyń ákimi. 2023-2024 jyldary — QR Prezıdentiniń keńesshisi. 2024 jyldyń 31 naýryzynan bastap QR Premer-Mınıstriniń orynbasary bolyp tabylady.