Batys Qazaqstan oblysynyń qylmystyq ister jónindegi mamandandyrylǵan soty 29 qyrkúıekte aǵasyn óltirdi dep aıyptalǵan 26 jastaǵy er adamǵa úkim shyǵardy, dep habarlaıdy infohub.kz saıty.
Sottalýshy Qazaqstan Respýblıkasy Qylmystyq kodeksiniń 99-baby «Adam óltirý» boıynsha kináli dep tanylyp, ortasha qaýipsizdiktegi qylmystyq-atqarý júıesi mekemesinde 12 jylǵa bas bostandyǵynan aıyryldy. Sonymen qatar, sottalǵan adamǵa psıhotroptyq zattar men аlkogólge táýeldilikten májbúrlep emdeý taǵaıyndaldy, al qaza tapqan adamnyń otbasyna 12 mln teńge kóleminde moraldyq zıan ótemaqysyn tóleý mindetteldi.
Qaıǵyly oqıǵa bıylǵy jyldyń 19 mamyryna qaraǵan túni Jánibek aýdanynda birge аlkogól ishken kezde bolǵan. Sottalýshy men onyń 18 jastaǵy týysy arasynda janjal shyqqan. Aıyptaý boıynsha, er adam ústelden asqana pyshaǵyn alyp, jábirlenýshige keminde 15 ret soqqy jasaǵan: ekeýi moıyn tusyna, bireýi betine, taǵy 12-si keýdesi men ishine. Sonymen qatar, ol jábirlenýshini judyryqpen jáne shyntaqpen basyna, jaq súıegine jáne qabyrǵalaryna urǵan.
Alǵan jaraqattardan jas jigit sol jerde kóz jumdy. Qylmys izderin jasyrý úshin sottalýshy máıitti úıdiń artyna aparyp, qoqys shuńqyryna kómip tastaǵan.
Qylmystyń sumdyǵy sol, óltirgennen keıin sottalǵan adam uıyqtap, tańerteń turyp, eshteńe bolmaǵandaı ómirin jalǵastyrǵan. Onyń ústine, ol týystarymen birge óltirilgen adamdy izdep, áleýmettik jelilerde adamnyń joǵalǵany týraly habarlandyrýlar jarıalaǵan. Qylmysty ashýǵa óltirý túni jábirlenýshiniń sottalýshymen birge bolǵanyn kórsetken kýágerlerdiń arqasynda múmkin boldy.
Óltirilgen jigittiń anasy úkimdi tym jeńil dep sanaıtynyn málimdedi.
«Ol meniń ulymdy qatygezdikpen óltirdi. Beıbarys nebári 18 jasta edi. Ol neǵurlym qatań jazaǵa, keminde 20 jyl túrmege laıyq. Ol meniń ulymdy óltirip qana qoımaı, máıitin jasyrdy, sodan keıin bizge kelip, bir ústelde otyrdy. Biz ulymyzdy 8 kún izdedik. Osy ýaqytta máıit shirip bastady. Biz onymen durys qoshtasa almadyq», — dedi áıel.
Úkim zańdy kúshine engen joq jáne oǵan shaǵymdanýǵa bolady.