Birikken Ulttar Uıymynyń Bas hatshysy Antonıý Gýterrısh Qazaqstannyń Syrtqy ister mınıstri Muhtar Tileýberdimen kezdesýde respýblıkanyń qalyptasyp kele jatqan kóppolárly álemdegi róli kúsheıip kele jatqanyn atap ótip, Qazaqstandy «kópir salýshy» dep atady, dep habarlaıdy infohub.kz saıty.
Qazaqstan Syrtqy ister mınıstrliginiń baspasóz qyzmeti habarlaǵandaı, syrtqy saıası vedomstvo basshysy Bas hatshyǵa Qazaqstan Prezıdenti Qasym-Jomart Toqaevtyń sálemin jetkizip, Gýterrıshtiń respýblıka men Birikken Ulttar Uıymy arasyndaǵy jan-jaqty yntymaqtastyqty nyǵaıtýǵa qosqan jeke úlesin atap ótti.
Kelissóz barysynda taraptar halyqaralyq kún tártibindegi ózekti máseleler men BUU Bas Assambleıasynyń 81-sessıasy aıasyndaǵy ózara is-qımyldyń basym baǵyttaryn talqylady.
Muhtar Tileýberdi Bas hatshynyń Uıym qyzmetiniń tıimdiligin arttyrý jónindegi kúsh-jigerin qoldaıtynyn rastady. Osy oraıda Almatydaǵy Ortalyq Azıa men Aýǵanstan úshin Turaqty damý maqsattary jónindegi BUU Óńirlik ortalyǵynyń kópjaqty yntymaqtastyqtyń óńirlik ólshemindegi negizgi alań retindegi qyzmetine erekshe nazar aýdaryldy.
Antonıý Gýterrısh óz kezeginde Qazaqstannyń negizgi halyqaralyq seriktestermen syndarly qarym-qatynas ustap turý qabiletin atap ótti.
Sońynda Qazaqstan Syrtqy ister mınıstri BUU-nyń Qurmetti qonaqtar kitabyna jazba qaldyryp, Bas hatshynyń kópjaqtylyqty nyǵaıtýǵa qosqan úlesin jáne Qazaqstannyń Uıym aıasyndaǵy odan ári ózara is-qımylǵa berik beıildiligin atap ótti.
Buǵan deıin «Kýrsıv» Qazaqstannyń BUU-da jańa bastamalardy jarıalaǵanyn jazǵan bolatyn. Qazaqstan Syrtqy ister mınıstri Muhtar Tileýberdi BUU Bas Assambleıasynyń 81-sessıasyndaǵy jalpy debattarda sóılep, halyqaralyq kún tártibindegi negizgi máseleler boıynsha Qazaqstannyń kózqarasyn usynyp, eldiń saıası jáne turaqty damý salasyndaǵy basymdyqtaryn belgiledi.