Álemde munaı baǵasy qaıtadan barreline 100 dollardan joǵary kóterildi: 10 qyrkúıekte Investing.com derekteri boıynsha Brent markasy 101 dollardan astam baǵamen saýdalanyp jatyr, al 8 qyrkúıekte ortasha baǵa 97 dollar shamasynda bolǵan, dep habarlaıdy infohub.kz saıty.
Baǵanyń kúrt ósýine Taıaý Shyǵystaǵy áskerı qaqtyǵystyń taǵy da ýshyǵýy sebep boldy. Sarapshylardyń pikirinshe, treıderler Iran men AQSh alty aılyq qaqtyǵys bastalǵannan bergi eń aýqymdy keme qatynasyna shabýyldar jasaǵannan keıin munaı jetkizilimindegi tereńirek úzilisterge daıyndalyp jatyr.
9 qyrkúıekte AQSh Irannyń bes munaı tankerin joıǵanyn málimdedi, buǵan deıin Islam revolúsıasynyń saqshylar korpýsy (IRSK) amerıkandyq áskerı kemege shabýyl jasaǵan bolatyn. Jaýap retinde IRSK Ormýz buǵazy mańynda eki amerıkandyq keme men segiz tankerge soqqy berdi.
Nátıjesinde Brent baǵasy tamyz aıynyń basynan beri shamamen 30%-ǵa ósti, sebebi AQSh pen Iran arasynda shabýyldardy toqtatý týraly turaqty kelisimge qol jetkizilmedi, al aıdyń sońynda áskerı qımyldar qaıta jandandy.
Sonymen qatar, munaıdyń qymbat baǵasy Qazaqstanǵa belgili bir dárejede paıdaly bolýy múmkin. «Qazınform» MA habarlaǵandaı, buǵan deıin Ulttyq bank tóraǵasy munaıdyń joǵary baǵasy el naryǵyna túsetin úlken valútalyq túsim ákeletinin, ol teńge baǵamyna oń áser etetinin atap ótken.
Alaıda buǵan deıin sarapshylar teńge baǵamyna tek qymbat munaı ǵana emes, syrtqy qaryzdar men altynnyń quny da áser etetinin eskertken.