Екі апта бұрын 120 долларға жуықтаған Brent маркалы мұнайдың бір баррелі қазір 92 доллар шамасында саудаланып жатыр. Сарапшылар мұндай төмендеуді АҚШ-тың әрекеттерімен байланыстырады, деп хабарлайды infohub.kz сайты.

Мұнай бағасының өсуін қолдаған факторлардың бірі — АҚШ пен Иран арасындағы әскери қақтығыс. Тараптардың қарсыласуы әлемдік мұнай жеткізілімінің едәуір бөлігі тасымалданатын Ормуз бұғазы арқылы кеме қатынасына кедергі келтіреді.

Алайда соңғы апталарда мұнай бағасы айтарлықтай төмендеді. Investing.com деректеріне сәйкес, 30 қазанда Brent баррелінің орташа құны 117,64 доллар болса, 18 қарашаға қарай ол 92,72 долларға түсті, яғни бірден 21%-ға.

2026 жылдың 30 қазанынан 18 қарашасына дейін мұнай котировкалары 21,21%-ға (немесе барреліне 24,95 долларға) төмендеп, қараша айының басында-ақ 100 доллар деген психологиялық шеңберден төмен түсті. Сауда сессияларының қорытындысы бойынша динамика былай болды: 30 қазан — 117,64 доллар, 2 қараша — 104,77, 3 қараша — 103,60, 4 қараша — 94,62, 5 қараша — 98,29, 6 қараша — 98,32, 9 қараша — 92,57, 10 қараша — 91,49, 11 қараша — 92,76, 12 қараша — 95,82, 13 қараша — 95,84, 16 қараша — 92,44, 17 қараша — 93,14, 18 қараша — 92,69 доллар.

Сарапшылардың пікірінше, мұнай бағасының төмендеуі ең алдымен АҚШ-тағы шикізат пен отын қорларының ұлғаюына байланысты. Бұл әлемдік нарықта ұсыныс тапшылығы болуы мүмкін деген қауіпті әлсіретеді. Бір апта ішінде елдегі шикі мұнай қорлары 5,28 млн баррельге, ал бензин қорлары 5,12 млн баррельге өсті.

Осылайша, мұнай нарығындағы шиеленіс сақталып отырса да, АҚШ-тағы қорлардың өсуі мен ұсыныс жағдайының жақсаруы бағаның жақындағы ең жоғары деңгейлерден шегінуіне мүмкіндік береді.

Еске салайық, мұнай бағасының төмендеуі айдың басында-ақ — АҚШ-тағы Конгреске сайлаудан кейін басталған еді.