Ulybrıtanıada dárigerler alǵash ret aýyr týa bitken aqaýdy túzetý úshin nárestege onyń dúnıege kelgenge deıin ota jasady. Bul oqıǵa álemdik medısınadaǵy mańyzdy qadam boldy, dep habarlaıdy infohub.kz saıty.
Sharanada gastroshızıs aýrýynyń kúrdeli túri anyqtaldy — bul ishektiń qursaq qýysynan tys jerde qalyptasýy. Aqaý júktiliktiń 20-aptasynda anyqtaldy. Ádette mundaı balalarǵa týǵannan keıin bir nemese birneshe ota jasalyp, reanımasıada uzaq emdelý jáne uzaq qalpyna kelý kezeńi qajet bolady. Keıbir naýqastarda ómir boıy ishekpen baılanysty eleýli problemalar saqtalady.
Bul jaǵdaıda bolashaq anaǵa halyqaralyq klınıkalyq zertteýge qatysý usynyldy. Júktiliktiń 26-aptasynda operasıa AQSH-taǵy Tehas balalar aýrýhanasynda (Texas Children’s Hospital) Londondaǵy Great Ormond Street Hospital mamandarymen birlesip jasaldy. Hırýrgtar kishkene kesý arqyly jatyrǵa qol jetkizip, amnıotıkalyq suıyqtyqty ýaqytsha kómirqyshqyl gazymen almastyryp, ishekti qursaq qýysyna muqıat qaıtardy. Sodan keıin jatyrdy jaýyp, júktilik qalypty jalǵasty.
Otaǵa deıin birneshe apta buryn sharanaǵa qursaq qabyrǵasynyń bulshyq etterine botýlotoksın egildi, bul tinderdi bosańsytyp, operasıany jeńildetýge kómektesti.
Teo dep atalǵan ul bala shamamen úsh aıdan keıin dúnıege keldi. Týǵannan keıin ol birden emshek sútin ishe aldy, ekinshi kúni tolyqtaı tabıǵı tamaqtanýǵa kóshti, al tórtinshi kúni úıine shyǵaryldy. Dárigerlerdiń aıtýynsha, qazir bala qalypty damyp keledi.
Mundaı operasıanyń basty artyqshylyǵy — ishekti týǵanǵa deıin qorǵaý. Ol qursaq qýysynan tys jatqanda, amnıotıkalyq suıyqtyq ony birtindep zaqymdaıdy. Eger ishekti júktilik kezinde ornyna qaıtarsa, asqyný qaýpi aıtarlyqtaı tómendeıdi.
Teo — álemde úshinshi, al Ulybrıtanıada osyndaı operasıa jasalǵan alǵashqy bala. Ádis ázirge eksperımentaldy kúıinde qalyp, klınıkalyq synaqtardan ótýde.