Uzaqqa sozylǵan álsizdik, túngi terleý jáne býyndardyń syrqyraýy — kópshilik bul belgilerdi ádettegi sharshaý nemese sozylmaly JRVI dep esepteıdi. Alaıda olardyń artynda áldeqaıda qaýipti indet jasyryn bolýy múmkin. Bul týraly ınfeksıonıst Sáýle Syrǵabaeva aıtyp berdi, dep habarlaıdy infohub.kz saıty.
«Brýselez — juqpaly aýrý, ony adam juqtyrǵan janýarlardan nemese janýar tektes ónimderden juqtyrady. Ásirese, pasterlenbegen sút, úı irimshigi nemese basqa da sút ónimderin tutynatyn bolsańyz, ne aýyl sharýashylyǵy janýarlarymen jumys isteıtin bolsańyz, bul týraly este saqtaý óte mańyzdy», — dep jazdy ol áleýmettik jelidegi paraqshasynda.
Qandaı belgiler alańdatýy múmkin? Dárigerdiń aıtýynsha, uzaqqa sozylǵan nemese qaıtalanatyn temperatýra, qatty terleý (ásirese túnde), aıqyn álsizdik pen sharshaǵyshtyq, sondaı-aq bas aýrýy, bulshyqet pen býyndardyń aýyrýy alańdatýy kerek. Sonymen qatar, tábettiń tómendeýi jáne salmaqtyń azaıýy baıqalady.
«Brýselezdiń qaýiptiligi — belgiler aıqyn bolmaýy múmkin jáne basqa da kóptegen aýrýlardy eske túsiredi. Sonymen qatar, ınfeksıa býyndar men omyrtqany, júıke júıesin, júrekti, baýyrdy, kókbaýyrdy jáne nesep-jynys júıesin zaqymdaýy múmkin», — dep atap ótti dáriger.
Ózin-ózi emdeýmen aınalyspaǵan jón. Infeksıonıst dıagnostıkany dáriger sımptomdardy, epıdemıologıalyq anamnezdi jáne zerthanalyq zertteýlerdi eskere otyryp júrgizýi kerek ekenin atap ótedi. «Brýselez antıbıotıktermen emdeledi, biraq sqemalar uzaq jáne dárigerdiń durys tańdaýyn talap etedi. Sondyqtan emdeýdi óz betinshe bastaýǵa bolmaıdy», — dep túsindiredi ol.
Ózińizdi qalaı qorǵaýǵa bolady? Syrǵabaeva profılaktıka óte qarapaıym ekenin atap ótedi. Pasterlengen sút pen sút ónimderin tańdaý kerek, al janýarlarmen jumys istegende qorǵanys quraldaryn mindetti túrde qoldaný qajet. Sonymen qatar, et óńdeý jáne janýarlardyń tinderimen janasý erejelerin saqtaý kerek.