Qazaqstannyń birinshi raketkasy, álemdik reıtıńte 11-orynda turǵan Aleksandr Býblık ATP-250 sanatyndaǵy Swiss Open Gstaad-2026 týrnıriniń birinshi aınalymyndaǵy machty fransýz Kenten Alıspen (90-raketka) keshe bastap, búgin ókinishti jeńilispen aıaqtady – 7:6 (7:4), 4:6, 6:7 (5:7). Bıik taýly shveısarıalyq kýrortqa jaýǵan nóser kesirinen kezdesý úzilgen bolatyn, dep habarlaıdy infohub.kz saıty.
Keshe tóreshiler machty úshinshi sette 6:5 15:0 esebimen qazaqstandyq, ıaǵnı Gshtaadtyń qazirgi chempıony paıdasyna bolǵan kezde toqtatty. Oıyn qaıta jalǵasqan soń Alıs geımdi utyp, sheshýshi partıany taı-breıkke jetkizdi. On úshinshi geım Býblık úshin sátsiz boldy: fransýz 4:0 esebimen alǵa shyqty, qazaqstandyq aıyrmany barynsha qysqartty – 4:5, biraq sońǵy sóz Kentende qaldy – 7:5.
Osylaısha, Birinshi Aleksandr ótken jylǵy tıtýlyn qorǵaı almady, al Alıs shırek fınalda Ekinshi Aleksandrmen oınaıdy.
Aleksandr Shevchenkonyń (100-raketka) Domınık Shtrıkermen (360-raketka) machyn da keshe jańbyr úzdi. Toqtatylǵan kezde týrnır uıymdastyrýshylarynan ýaıld-kard alǵan shveısarıalyq breıkpen 4:3 esebimen alda turǵan edi. Alaıda bizdiń tenısshi kezdesý barysyn ózgerte aldy jáne Shtrıkerge trıbýnalardyń qatty qoldaý kórsetýine qaramastan, eki sette jeńiske jetti – 7:6 (7:5), 6:2.
Swiss Open Gstaad týrnıri – Shveısarıanyń tenısten ashyq chempıonaty 1915 jyldan beri ótkizilip keledi. 1967 jylǵa deıin ártúrli qalalarda ótse, 1968 jyly Shveısarıa Alpisindegi tanymal taý shańǵysy kýrorty Gshtaadta turaqty ornyn tapty. Ol Eýropadaǵy eń bıik taýly ATP týrnıri sanalady (teńiz deńgeıinen 1050 metr).
2009 jyldan bastap týrnır ATP-250 sanatyna jatady. Jalpy júlde qory 612,5 myń eýrony quraıdy.
Ár jyldary Swiss Open Gstaad jeńimpazdary shveısarıalyq Rodjer Federer, reseılik Evgenı Kafelnıkov, shved Stefan Edberg, argentınalyq Gılermo Vılás jáne basqa da juldyzdar boldy.