Aqmola oblysynyń qutqarýshylary RIXOS LAKE BOROVOE qonaq úıin jáne feıerverk ushyrýmen korporatıv uıymdastyrǵan kompanıany jaýapkershilikke tartty. Aıyppul somalary Kursiv LifeStyle-ge belgili boldy, dep habarlaıdy infohub.kz saıty.
Áleýmettik jelilerde Shýche kólindegi qonaq úı aýmaǵynan salút atylǵanyn kórsetetin beınejazbalar paıda boldy. Oqıǵa ulttyq parkte órt qaýipti kezeńiniń kúshinde bolǵan kezinde oryn aldy, al buǵan deıin Býrabaıda órt tirkelgen edi.
Aqmola oblysynyń tótenshe jaǵdaılar departamenti 11 tamyzda jaǵdaıǵa túsinikteme berdi. Qonaq úıdiń ıesi men korporatıv ótkizgen uıym Qazaqstan Respýblıkasynyń Ákimshilik quqyq buzýshylyq týraly kodeksiniń 410-babynyń 1-bóligi boıynsha jaýapkershilikke tartyldy. Bul bap eskertý nemese aıyppul túrindegi jazany kózdeıdi.
Vedomstvonyń baspasóz qyzmetinde naqtylaǵandaı, qonaq úıge 324 375 teńge kóleminde aıyppul salyndy, al is-sharany uıymdastyrǵan kompanıaǵa — 32 myń teńge.
Buǵan deıin Býrabaıda tanymal týrısik baǵyttarǵa, onyń ishinde Bólektaý taýyna, Mahabbat alqabyna jáne Imanaev bulaǵyna beınebaqylaý kameralary ornatylǵany habarlanǵan bolatyn. Bul quqyq buzýshylardy jedel anyqtaýǵa jáne týrısermen bolǵan oqıǵalarǵa tezirek áreket etýge múmkindik beredi.