Býrabaı kýrorttyq aımaǵynda polısıa qyzmetkerleri jolaýshylardy tasymaldap kele jatqan serýendik elektroavtobýstyń júrgizýshisin mas kúıinde ustady, dep habarlaıdy infohub.kz saıty.
Oqıǵa Kenesary kóshesin patrúldeý kezinde boldy. Tártip saqshylary artqy gabarıttik shamdary jumys istemeı turǵan kólikke nazar aýdardy. Salonda jergilikti demalys úıleriniń birinen qaıtyp kele jatqan bes jolaýshy bolǵan.
Júrgizýshimen sóılesý kezinde polıseıler аlkogól ıisin sezip, medısınalyq kýálandyrýdan ótýdi usyndy. Er adam aldymen óz derekterin ataýdan bas tartty, biraq keıin rásimge kelisti.
Saraptama nátıjeleri ortasha dárejedegi аlkogóldik masańdyqty rastady. Sonymen qatar, onyń buryn júrgizýshi kýáliginen aıyrylǵany anyqtaldy.
Ustalǵan adamnyń aıtýynsha, ol demalys aımaqtarynyń birinde taǵylymdamadan ótip júrip, tanystaryn kýrorttyq aımaqpen serýendetýdi uıǵarǵan.
Osy fakti boıynsha sotqa deıingi tergeý bastaldy. Er adamǵa qatysty zańnamada kózdelgen sharalar qoldanylýda.
Polısıa kásipkerlerdi, ásirese týrızm jáne demalys salasyndaǵylardy, qyzmetkerlerdi jumysqa qabyldaý aldynda olardyń qujattaryn muqıat tekserýge shaqyrady. Qoldanystaǵy júrgizýshi kýáliginiń bolýyna jáne kólik basqarýǵa jiberilýge kedergi keltiretin shekteýlerdiń joqtyǵyna nazar aýdarý usynylady.
Buǵan deıin 2026 jyldyń basynan bastap Astanada mas kúıinde kólik júrgizgen myńǵa jýyq júrgizýshi jaýapkershilikke tartylǵany habarlanǵan bolatyn. Taǵy 69 adam kýáliginen aıyrylǵannan keıin kólik júrgizgeni úshin qylmystyq isterdiń fıgýranty atandy.