Almaty oblysynyń Boraldaı aýylynda Carlsberg Kazakhstan kompanıasynyń jańa аlkogólsiz sýsyndar zaýyty saltanatty túrde iske qosyldy. Kásiporynǵa salynǵan ınvestısıa kólemi $344 mln-dy qurady, al onyń qýaty jylyna 1 mlrd lıtrge deıin sýsyn shyǵarýǵa múmkindik beredi, dep habarlaıdy infohub.kz saıty.
Ónim PepsiCo kompanıasynyń lısenzıasy boıynsha óndiriledi. Sýsyndardy tek qazaqstandyq naryqqa ǵana emes, TMD elderine de eksporttaý josparlanýda — buǵan deıin eksport baǵyttarynyń qatarynda Qyrǵyzstan bar ekeni habarlanǵan.
«Qazaqstan men Danıa geografıalyq turǵydan bir-birinen alys ornalasqanymen, bul birlesken jumysqa kedergi emes. Jańa kásiporynnyń ashylýy — sonyń aıqyn dáleli ári bolashaqqa salynǵan ortaq ınvestısıa. Zaýyt sondaı-aq saýda kólemin ulǵaıtýǵa, jańa jumys oryndaryn ashýǵa, halyqtyń ál-aýqatyn arttyrýǵa jáne óndiriske jańa tehnologıalardy engizýge múmkindik beredi», – dedi ashylý rásimine qatysqan Danıanyń syrtqy ister mınıstri Lars Lókke Rasmýssen.
Birinshi kezeńde ártúrli dámdegi sýsyndar shyǵaryp, olardy qaptaıtyn bes óndiristik jeli iske qosyldy. Bolashaqta kásiporynnyń logıstıkalyq ınfraqurylymyn, onyń ishinde qoıma qýatyn jáne daıyn ónimdi tasymaldaý júıesin damytý josparlanýda.
Zaýytqa shıkizat jergilikti óndirýshilerden satyp alynady, bul ónim qunyn tómendetýge yqpal etýi tıis. Sonymen qatar kásiporynda energıa únemdeıtin tehnologıalar engizilgen.
Eske salaıyq, Alataýda PepsiCo kompanıasynyń tuzdalǵan jeńsik as óndiretin zaýyty da salynyp jatyr. Ony 2026 jyldyń maýsymynda ashý josparlanǵan. Tolyq qýatqa shyqqanda kásiporyn jylyna 210 myń tonnaǵa deıin kartop óńdep, 70 myń tonna chıpsy shyǵarady.