Saýd Arabıasynyń Ceer markasy óziniń tuńǵysh elektromobıli Exobot-tyń eki nusqasyn — sedan men krosoverdi tanystyrdy. Syrtqy kórinisi bolashaq týraly kompúterlik oıynnan shyqqan kólikterge uqsaıdy, alaıda bular 2027 jyly konveıerge qoıylatyn naqty avtomobılder, dep habarlaıdy infohub.kz saıty.
Exobot-tyń basty vızýaldyq ereksheligi — uzyndyǵy 2,4 metr bolatyn alyp aldyńǵy áınek, ol kapotqa birtindep ulasady. Ceer kompanıasynyń málimdeýinshe, bul serıalyq avtomobılder arasyndaǵy eń úlken «aldyńǵy áınek».
Sedannyń uzyndyǵy 5,26 metr, eni 2,1 metr, bıiktigi 1,43 metr boldy. Krosover sál qysqaraq — 5,02 metr, biraq aıtarlyqtaı bıik. Eki kóliktiń de esikteri joǵary qaraı ashylady. Óndirýshi olardy saýd suńqarynyń qurmetine Shahin Wing Doors dep ataıdy.
Syrtqy kelbeti — bólek áńgime. Dızaıner syzbalaryn ústelde qaldyryp, túski asqa ketken, al balasy onyń ornyna biraz jumys isteýdi sheshken sıaqty áser qalady. Tek nátıjeni sebetke tastamaı, óndiriske jibergen.
Alaıda tehnıkalyq turǵydan Exobot áldeqaıda myqty kórinedi. Top nusqasy jalpy qýaty 1111 at kúshi jáne 1500 Nm bolatyn úsh elektr qozǵaltqyshyn alady. Sedan 100 km/saǵ jyldamdyqqa 2,1 sekýndta, krosover 2,4 sekýndta jetedi.
Bastapqyda kólikter 850 a.k. jáne 1000 Nm bolatyn First Edition nusqasynda usynylady — 100 km/saǵ-qa deıingi jedeldeý sáıkesinshe 2,6 jáne 2,9 sekýndty alady.
Eki nusqa da 112 kVt·saǵ batareıasyn alady. Sedannyń júrý qory NEDC sıkli boıynsha 670 km, krosoverdiki — 560 km dep málimdelgen. 800 vólttyq arhıtektýranyń arqasynda 10-nan 80%-ǵa deıin qýattaý 30 mınýttan az ýaqyt alady.
Salonda da bári fantasıka kanondary boıynsha: aldyńǵy paneldiń búkil joǵarǵy bóligin alyp turǵan 48 dúımdik ekran, mýltımedıaǵa arnalǵan bólek 10,4 dúımdik tachskrın jáne artqy jolaýshylarǵa arnalǵan 8 dúımdik dıspleı. Rúl shtýrval túrinde jasalǵan, al daýystyq kómekshi jasandy ıntellektti paıdalanady.
Ceer Exobot-ty tanymal tehnologıalyq seriktesterdiń qatysýymen jasady. Foxconn elektr arhıtektýrasyna jaýapty, BMW ınjenerlik tehnologıalardy usyndy, al elektr jetekterin Rimac Technology men Hyundai Transys jetkizedi. Óndiris Saýd Arabıasynda, kоról Abdalla atyndaǵy ekonomıkalyq qalada jolǵa qoıylady.
Baǵalar ázirge jarıalanǵan joq. Bolashaqta Ceer 2028–2030 jyldary taǵy bes model usynýǵa ýáde berip otyr. Sonymen qatar kompanıa tek elektromobılder shyǵarý ıdeıasynan bas tartty: jelisinde gıbrıdter men ishki janý qozǵaltqyshty kólikter paıda bolady.
Exobot oǵash kórine me? Álbette. Biraq bir kezderi qytaılyq avtomobılderdi de kúlki etken, al qazir olar álemdik brendtermen shyndap básekelesedi. Múmkin, birneshe jyldan keıin mundaı dızaın da bolashaqtan kelgen nárse bolyp kórinbeıtin shyǵar.
Buǵan deıin Kýrsıv Avto Volkswagen-nyń rekordtyq tómen shyǵyny jáne erekshe dızaıny bar elektrokýpesin kórsetkenin jazǵan edi.