Sońǵy 20 jylda aýadaǵy kómirqyshqyl gazynyń konsentrasıasynyń artýy adam qanynyń bıohımıasynda ózgeristerge ákelgenin avstralıalyq zertteýshiler anyqtady. «Air Quality, Atmosphere and Health» jýrnalynda jarıalanǵan derekterge sáıkes, qandaǵy gıdrokarbonat deńgeıi joǵarylap, kálsı mólsheri tómendegen, dep habarlaıdy infohub.kz saıty.
Avstralıanyń balalar zertteý ınstıtýtynyń dosenti Aleksandr Larkým áriptesterimen birge 1999 jyldan bastap AQSH-tyń jeti myńnan astam turǵynynyń medısınalyq kórsetkishterin taldady. Jıyrma jyl ishinde qatysýshylardyń qanyndaǵy gıdrokarbonattyń ortasha deńgeıi shamamen 7 paıyzǵa óskeni anyqtaldy, bul atmosferadaǵy kómirqyshqyl gazynyń ósý dınamıkasyn kórsetedi. Sonymen qatar, aǵzadaǵy kálsı men fosfor kórsetkishteri tómendegen.
Gıdrokarbonat qyshqyl-siltilik tepe-teńdikti saqtaý úshin qajet. Ony jınaqtaı otyryp, aǵza artyq kómirqyshqyldy ótep, rN deńgeıin turaqty ustaıdy. Zertteý avtorlary qazirgi úrdis saqtalsa, aldaǵy 50 jylda gıdrokarbonat kórsetkishi normanyń joǵarǵy shegine jaqyndaýy múmkin ekenin eskertedi.
Zertteýshiler atmosferadaǵy CO2 ósýin tek klımattyń ózgerý faktory retinde ǵana emes, adam densaýlyǵyna uzaq merzimdi qaýip retinde de qarastyrýǵa shaqyrady.