Sınoptıkter 4 qazan, jeksenbi kúni Qazaqstannyń barlyq derlik aýmaǵynda daýyl eskertýin jarıalady. Bul týraly infohub.kz saıty «Qazgıdromet» RMK-ǵa silteme jasap habarlaıdy.
Sınoptıkterdiń dereginshe, 4 qazanǵa qaraǵan túni jáne tańerteń Soltústik Qazaqstan oblysynyń batysy men soltústiginde tuman kútiledi. Qostanaı oblysynda túnde jáne tańerteń tuman batysta jáne soltústikte bolady. Abaı oblysynyń shyǵysynda da túnde jáne tańerteń tuman kútiledi. Oblystyń batysynda, soltústiginde jáne ortalyǵynda ońtústik-shyǵys jáne ońtústik jel sekýndyna 15-20 metrge jetedi, kúndiz ekpini sekýndyna 25 metrge deıin barady.
Shyǵys Qazaqstan oblysynyń shyǵysynda túnde jáne tańerteń tuman bolady. Batys Qazaqstan oblysynyń soltústiginde, shyǵysynda jáne ońtústiginde jańbyr men qar túrinde jaýyn-shashyn, túnde jáne tańerteń oblystyń soltústigi men shyǵysynda tuman kútiledi.
Mańǵystaý oblysynyń batysynda, soltústiginde jáne ortalyǵynda negizinen jańbyr túrinde jaýyn-shashyn, túnde jáne tańerteń oblystyń soltústigi men ortalyǵynda tuman bolady. Túrkistan oblysynda jańbyr, naızaǵaı, kúndiz oblystyń batysynda, soltústiginde, taýly jáne taý bókterindegi aýdandarynda qatty jańbyr kútiledi. Shymkentte de jańbyr, naızaǵaı, kúndiz keıde qatty jańbyr bolady.
Aqmola oblysynyń batysy men soltústiginde túnde jáne tańerteń tuman kútiledi. Pavlodar oblysynda sekýndyna 15-20 metrge deıingi jel boljanady. Atyraý oblysynyń soltústiginde, shyǵysynda jáne ońtústiginde túnde jańbyr men qar túrinde jaýyn-shashyn, kúndiz oblystyń soltústiginde, shyǵysynda jáne ońtústiginde jańbyr bolady.
Jambyl oblysynda jańbyr men naızaǵaı, kúndiz jańbyr men naızaǵaı, oblystyń batysy men ońtústigindegi taýly aýdandarda qatty jańbyr, burshaq, ekpindi jel kútiledi. Aqtóbe oblysynyń batysy men soltústiginde túnde kóktaıǵaq bolady.
Qyzylorda oblysynyń shyǵysy men soltústiginde jańbyr, naızaǵaı, ekpindi jel, shańdy daýyl kútiledi. Túnde oblystyń soltústiginde topyraq betinde mınýs 1 gradýsqa deıin úsik boljanady. Qaraǵandy oblysynyń soltústik-batysynda, shyǵysynda jáne ońtústiginde joǵary órt qaýpi saqtalady, oblystyń batysynda, soltústiginde jáne ortalyǵynda tótenshe órt qaýpi bar. Ulytaý oblysynyń soltústiginde, shyǵysynda jáne ońtústiginde jańbyr men qar túrinde jaýyn-shashyn kútiledi.
Jetisý oblysynda jel ekpini sekýndyna 15-20 metrge, keıde 23-28 metrge jetedi. Oblystyń shyǵysynda tótenshe órt qaýpi saqtalady. Almaty oblysynda jel ekpini sekýndyna 16-21 metr bolady. Almatyda ońtústik-shyǵys jel batysqa aýysyp, ekpini sekýndyna 16-21 metrge jetedi.