Qazaqstan úkimetinde kadrlyq ózgeris: Darhan Myrzabaev ónerkásip jáne qurylys vıse-mınıstri bolyp taǵaıyndaldy, dep habarlaıdy infohub.kz saıty.
Qazaqstan Respýblıkasy Úkimetiniń qaýlysymen Myrzabaev Darhan Tleýberdiuly ónerkásip jáne qurylys vıse-mınıstri laýazymyna taǵaıyndaldy, dep málimdedi úkimettiń baspasóz qyzmeti.
Jańa vıse-mınıstr 1989 jyly Pavlodar oblysynda dúnıege kelgen. Ol K. Sátbaev atyndaǵy Qazaq ulttyq tehnıkalyq ýnıversıtetin, Munaı jáne energıa kózderiniń ulttyq joǵary mektebin (Fransıa), Reseı Federasıasy Úkimetiniń janyndaǵy Qarjy ýnıversıtetin, sondaı-aq Qytaı-Eýropa halyqaralyq bıznes mektebin bitirgen.
Darhan Myrzabaev eńbek jolyn Almatydaǵy «PGS Kazakhstan» JSHS-de geofızık-stajer bolyp bastaǵan. 2012–2015 jyldary Londondaǵy Schlumberger Ltd kompanıasynda aǵa dalalyq geofızık bolyp jumys istegen. 2015–2019 jyldary «Tarbaǵataı Munaı» JSHS barlaý jáne ıgerý departamentinde kishi ınjener jáne ken oryndaryn ıgerý ınjeneri laýazymdaryn atqarǵan. 2020 jyly Amazon EU S.A.R.L kompanıasynyń baǵdarlama menedjeri bolǵan.
2021–2022 jyldary «Ernst end Iang konsýltasıalyq qyzmetter» JSHS-de aǵa keńesshi bolyp jumys istegen. 2022–2023 jyldary Pavlodar oblysynyń sıfrlyq tehnologıalar basqarmasynyń basshysy mindetin atqarýshy jáne basshysy laýazymdaryn atqarǵan. 2023 jyly «CSI Stat» JSHS-niń menedjeri bolǵan. 2024 jyly Sıfrlyq damý, ınovasıalar jáne aeroǵarysh ónerkásibi mınıstrliginiń ınovasıalardy damytý departamentiniń dırektory mindetin atqarýshy, sodan keıin dırektory bolyp taǵaıyndalǵan. 2024–2025 jyldary sol mınıstrliktiń jasandy ıntellekt jáne ınovasıalardy damytý komıteti tóraǵasynyń orynbasary bolǵan.
2025 jylǵy qazannan bastap jańa taǵaıyndaýǵa deıin Úkimet apparatynyń jasandy ıntellekt jáne sıfrlyq transformasıa bólimin basqarǵan.