Qazaqstanda bankter týraly jańa zań kúshine endi. Bul zań problemaly bankterdiń salymshylaryna tólemderdi jedeldetedi. Endi Qazaqstandyq depozıtterge kepildik berý qorynyń (QDKQ) rezervinen ótemaqy tóleýdiń eń uzaq merzimi 35 jumys kúninen 20 jumys kúnine qysqardy, dep habarlaıdy infohub.kz saıty.
Qordyń málimetinshe, tıisti ózgerister jańa bank zańnamasynda bekitilgen jáne salymshylardyń quqyǵyn qorǵaýdy kúsheıtýge baǵyttalǵan. İs júzinde tólemder burynǵy normatıvterden áldeqaıda erte bastalatyn. Mysaly, Tengri Bank, «AzıaKredıt Bank» jáne Capital Bank Kazakhstan kompanıalarynyń lısenzıasy qaıtarylǵannan keıin salymshylar 6–8 jumys kúni ishinde ótemaqy alýǵa ótinish bere aldy. Osy úsh bank boıynsha tólemderdiń jalpy somasy 38 mlrd teńgeden asty.
QDKQ tólemderdi bastaý merzimin odan ári qysqartýdy josparlap otyr. Ol úshin jetkilikti qarjylyq baza qalyptastyrylǵan: qordyń arnaıy rezervi 1,7 trln teńgeden asyp, zańda belgilengen nysanaly deńgeıden joǵary.
Buǵan deıin Qazaqstan úkimeti 2026-2029 jyldarǵa arnalǵan halyqtyń tabysyn arttyrýdyń keshendi josparyn bekitken bolatyn. Qujattyń negizgi tarmaqtarynyń biri – memlekettik qoldaý alatyn bıznes úshin jańa mindettemeler.