Qazaqstanda jeke tulǵalardyń depozıt kólemi 30 trıllıon teńgeden asty, al valútalyq salymdardyń úlesi jalpy somanyń 20 paıyzynan az boldy. Ósimniń barlyǵy derlik (96%) teńgelik depozıtter esebinen qamtamasyz etildi, dep habarlaıdy infohub.kz saıty.
Buǵan deıin qazaqstandyqtardyń bank depozıtterindegi qarajatynyń jalpy somasy alǵash ret 30 trıllıon teńgeden asqany habarlanǵan bolatyn. Depozıtterge kepildik berý qorynyń (KFGD) derekterine sáıkes, 2026 jyldyń ekinshi toqsanynda ósim 1,9 trıllıon teńgeni qurap, kepildik berý júıesi tarıhyndaǵy absolútti rekordqa aınaldy. Bir jyl ishinde depozıtter 4,6 trıllıon teńgege ósti. Aıta keteıik, ósimniń barlyǵy derlik (96%) ulttyq valútadaǵy salymdar esebinen qamtamasyz etildi.
Sarapshylar mundaı dınamıkany depozıtter boıynsha joǵary syıaqy mólsherlemelerimen baılanystyrady. Bazalyq mólsherleme 18% bolǵan kezde bankter jekelegen ónimder boıynsha jyldyq 20–20,5% deıin usyndy. Al valútalyq salymdarǵa keler bolsaq, ekinshi toqsanda olar nebári 25,6 mıllıard teńgege ósti. Onyń ústine, olardyń teńgelik kórsetkishtegi kóleminiń ósýiniń edáýir bóligi naqty aqsha aǵynymen emes, valútany qaıta baǵalaýmen baılanysty boldy. Nátıjesinde valútalyq salymdardyń jalpy somadaǵy úlesi rekordtyq mınımýmǵa – 19,8%-ǵa tústi. Salystyrý úshin: 2015 jyly valútalyq depozıtterdiń úlesi 80%-ǵa jetken edi.
Barlyq depozıtterdiń jartysyna jýyǵy (49,3%) qaldyǵy 15 mıllıon teńgege deıingi shottarǵa tıesili. Bul jappaı segment dep atalady jáne onyń úlesi turaqty túrde tómendep keledi. Túsinikti bolý úshin: 2021 jyly oǵan barlyq qarajattyń 55,1% tıesili edi. Al orta segmenttiń úlesi, kerisinshe, ósti, munda 15-ten 50 mıllıon teńgege deıin saqtalady. 2021 jyly oǵan nebári 12,2% tıesili bolsa, qazir – 19,2%. İri segmentke (qaldyǵy 50 mıllıon teńgeden joǵary) jınaqtyń 31,5% tıesili.
Analıtıkterdiń pikirinshe, orta segment úlesiniń artýy salymshylardyń ál-aýqatynyń birtindep jaqsaryp kele jatqanyn kórsetedi jáne bankter arasynda aýqatty klıentter úshin básekelestiktiń júıeli túrde kúsheıip kele jatqanyn bildiredi. Aıta keteıik, buǵan deıin Ulttyq bank bazalyq mólsherlemeni tómendetken bolatyn, al odan keıin ekinshi deńgeıli bankter de depozıtter boıynsha paıyzdardy tómendete bastady. Alaıda sarapshylar bul depozıttik bazanyń tómendeýine nemese onyń ósýiniń aıtarlyqtaı baıaýlaýyna ákelmeıdi dep sanaıdy – halyq úshin banktik salymdar jınaqtaýdyń negizgi quraly bolyp qala beredi.