Қазақстанда көмірді терең қайта өңдеуге арналған үш ірі өнеркәсіптік жоба іске қосылды. Екібастұз мәслихатының депутаты Денис Черкашинге қатысы бар компаниялар Қарағанды және Павлодар облыстарында дизель отынын шығаруға лицензия алды, деп хабарлайды infohub.kz сайты.
Энергетика министрлігінің мәліметінше, көмірден дизель отынын өндіруге арналған қуаты 100 мың тонна болатын екі жобаны Павлодар облысында Naz Dan Group және Қарағанды облысында Alfa Plast компаниялары жүзеге асыруда. Екі кәсіпорынға да жер қойнауын пайдалануға лицензия берілген.
Adata дерегінше, осы компаниялардың, сондай-ақ «КАЗ НЕДРО РЕСУРС» компаниясының құрылтайшысы — Денис Черкашин. Ол Екібастұз қалалық мәслихатының депутаты және Satbayev University-дің тәуелсіз директоры. Черкашиннің үшінші компаниясы да болашақта Сарыкөл кен орны базасында 100 мың тонна дизель отынын өндіруді жоспарлап отыр.
Сонымен қатар, Қарағанды облысында қытайлық инвестормен бірлесіп, жылына бір миллион тонна металлургиялық кокс өндіретін зауыт салынуда. Энергетика министрлігі компаниялардың атауын көрсетпеді.
Энергетика министрлігі 2026–2031 жылдарға арналған Жол картасының жобасын әзірледі. Құжатқа 200 мың тоннаға дейін шайырды қайта өңдеу мен бензол өндіруді көздейтін коксохимиялық кластер енгізілген.
Абай облысында Samal Commodities компаниясы 300 мың тонна аммиак және 520 мың тонна карбамид өндіруді жоспарлап отыр. Бұл кәсіпорынның құрылтайшысы Бернар Дайырбеков. Ол 2021 жылы ауыл шаруашылығы вице-министрі қызметін атқарған және 2019 жылы Продкорпорация директорлар кеңесінің төрағасы болған Нұрбек Дайырбековтің ұлы.
«Көмірхимияны дамыту көмірді пайдаланудың шикізаттық моделінен жоғары қайта өңделген өнім өндіруге көшуге мүмкіндік береді», — деп атап өтті ведомство.
2025 жылдың сәуірінде Тау-кен және металлургия кәсіпорындары қауымдастығының атқарушы директоры Николай Радостовец Қазақстанның шикізат күн тәртібін сирек кездесетін металдармен шектемей, көмірхимияны дамытуға назар аударуға шақырған болатын.
MINEX Kazakhstan конференциясында ол жекелеген шикізат түрлеріне сұраныс технологиялармен бірге өзгеретінін атап өтті: әр кезеңде алюминий, мыс және болат назарда болып, кейін сирек кездесетін металдарға қызығушылық күрт өсті. Сонымен қатар, оның айтуынша, әлемдік көмір жағуды қысқарту бағытына қарамастан, Қазақстан көмір саласына да инвестиция тартуы қажет.