Qant dıabeti men semizdikke qarsy qoldanylatyn tanymal preparattar nevrologıada jańa qoldanys tabýy múmkin. infohub.kz saıtynyń habarlaýynsha, zertteýshiler olardyń bassúıek ishilik qysymdy tómendetý jáne bas aýrýynyń jıiligin azaıtý áleýetin anyqtaǵan.
Glúkagon tárizdi peptıd-1 (GLP-1) reseptorlarynyń agonısteri bastapqyda ekinshi tıpti qant dıabeti men semizdikti emdeýge arnalǵan. Alaıda olar mıgren men ıdıopatıalyq bassúıek ishilik gıpertenzıany (IBG) emdeýde úmit kúttiretin nátıjeler kórsetýde. Sheteldik basylymda jarıalanǵan ǵylymı sholý bul preparattardy tikeleı maqsatynda emes (off-label) qoldaný atalǵan nevrologıalyq patologıalarda tıimdi bolýy múmkin ekenin kórsetti.
Ǵalymdardyń aıtýynsha, GLP-1 reseptorlary mıdyń tamyrly shoǵyrynda da ornalasqan. Osynyń arqasynda preparattar julyn suıyqtyǵynyń sekresıasyn tómendete alady jáne bassúıek ishilik qysymdy azaıtady. Klınıkalyq baqylaýlar barysynda GLP-1 agonısterin qabyldaý bas aýrýy ustamalarynyń jıiliginiń tómendeýimen, kórý júıkesiniń isinýiniń azaıýymen jáne IBG bar pasıentterde kórýdiń nasharlaý qaýpiniń tómendeýimen baılanysty boldy. Sonymen qatar, qysymnyń erte tómendeýi qysqa merzimde baıqaldy, bul áserdiń dene salmaǵynyń birtindep tómendeýine táýelsiz ekenin kórsetedi.
GLP-1-diń qabynýǵa qarsy jáne neıroprotektorlyq qasıetterine qaramastan, avtorlar alynǵan derekterdi rastaý úshin iri randomızasıalanǵan zertteýler júrgizý qajettigin atap ótedi.
Aıta ketý kerek, bul materıal tek aqparattyq sıpatta jáne áreketke nusqaýlyq bolyp tabylmaıdy. «Ozempık» jáne «Vegovı» preparattary — bul keń aýqymdy qarsy kórsetilimderi men janama áserleri bar kúrdeli resepttik dáriler. Bul dárilerdi mamannyń taǵaıyndaýynsyz qoldaný densaýlyǵyńyzǵa aýyr zıan keltirýi múmkin. Kez kelgen emdi bastamas buryn nemese preparattardy qabyldamas buryn mindetti túrde bilikti dárigermen keńesińiz.